Përkeqësimi i situatës, Meta: Duhet plan i qartë për menaxhimin e situatës
Presidenti i Republikës, Ilir Meta, kërkon ndërhyrjen e qeverisë për të mirëmenaxhuar situatën e pandemisë. Duke marrë shkas nga analiza e të dhënave të COVID-19 nga Zëri i Amerikës për javën që lamë pas, të cilat reflektonin një përkeqësim të ndjeshëm të situatës, kreu i shtetit “i tërheq veshin” qeverisë duke i thënë se pandemia nuk ndalet me propagandë. Meta shtron nevojën e hartimit të një plani të qartë për përballimin e pandemisë, që nga kushtet në spitale e deri te plani i vaksinimit. “Sipas të dhënave zyrtare të përpunuara nga Zëri i Amerikës, numri i të prekurve nga pandemia arriti në 4830, ose 20.4 për qind më shumë se një javë më parë. Ky është niveli më i lartë i shënuar, që pas javës së dytë të dhjetorit. Nevojitet një plan i qartë, që duhet ta kishim prej kohësh, për menaxhimin efikas të situatës, përmirësimin e prekshëm të kushteve në spitale, rritjen e masave mbrojtëse për mjekët e infermierët dhe veçanërisht për vaksinimin e popullatës. COVID-19 nuk ndalet me propagandë. Shëndeti dhe jeta e shqiptarëve duhet të jenë prioritet absolut”. Sipas Zërit të Amerikës, java që lamë pas rezultoi me nivelin më të lartë të shifrave të infektimeve dhe fataliteteve që pas pikut të pandemisë në mes të dhjetorit të 2020-ës, me një mesatare ditore rastesh prej 690 qytetarësh. Handikapi qëndron në faktin se rritja e numrit të të infektuarve vjen në përpjesëtim të zhdrejtë me testimet, të cilat në vend që të ngrinin nivelin e alertit dhe të rriteshin, pësuan ulje me -4.4 për qind. Një tjetër tregues i përkeqësim të situatës, është dhe pozitiviteti, i cili u ngjit në 22.7 për qind, nga 18.1 për qind që ishte në javën pararendës dhe dy ditët e fundit po afron në nivelet e 30%.