Trafik kokaine e heroine, grabitje me armë, 9 shqiptarë ekstradohen në Itali

Nga 27- vjeçari Athanas Xhuveli që për 3 vjet i "rezistoi" ekstradimit se u dënua në Tiranë, te 72- vjeçari Maliq Hyka i dënuar për drogë

Nëntë shtetas shqiptarë janë ekstraduar dje në Itali, gjatë një operacioni të përbashkët të Interpol Tiranës me Zyrën e Bashkëpunimit Ndërkombëtar të Policisë Italiane ( SCIP).

Policia e Shtetit njoftoi dje se vazhdon me sukses dhe rezultate të shkëlqyera puna në grup midis Policisë së Shtetit dhe Zyrës së Bashkëpunimit Ndërkombëtar të Policisë Italiane ( Criminalpol). Si rezultat i këtij bashkëpunimi, nga Interpol Tirana, në bashkëpunim me Zyrën e Bashkëpunimit Ndërkombëtar të Policisë Italiane ( SCIP), gjatë ditës së sotme u ekstraduan drejt Italisë 9 persona të kërkuar që janë arrestuar në Shqipëri në periudha të ndryshme, në harkun kohor të një viti. Të ekstraduarit janë shtetas shqiptarë nga mosha 27 deri 72 vjeç, të cilët ishin fshehur në Shqipëri për t'iu shmangur urdhërarresteve ndërkombëtare të lëshuara nga Prokuroritë e Barit, Bergamos, Chietit, Firences, Aquilës, Milanos dhe Napolit. Personat që u ekstraduan janë kapur nga Policia e Shtetit dhe janë të përfshirë në vepra kriminale, si: shkelje e ligjit për narkotikët, vjedhje, grabitje, pastrimi i produkteve të veprës penale dhe organizatë kriminale me qëllim trafikun e lëndëve narkotike. Finalizimi i operacionit erdhi si rezultat i shkëmbimit të informacionit investigativ dhe aktivitetit hetimor të kryer në territorin shqiptar gjatë disa muajve, duke i vënë theksin bashkëpunimit midis Policisë së Shtetit Shqiptar dhe Zyrës së Bashkëpunimit Ndërkombëtar të Policisë Kriminale Italiane, nëpërmjet Zyrës së Bashkëpunimit Ndërkombëtar të Policisë Italiane UCI Albania. Ky operacion tregoi edhe një herë besueshmërinë e Policisë së Shtetit te homologët dhe vendosmërinë e saj për të bashkëpunuar ngushtësisht me ta në drejtim të goditjes së krimit të organizuar dhe terrorizmit.

Të ekstraduarit janë shtetasit: Luan Bodlli, 42 vjeç; Florenc Mema, 31 vjeç; Demokrat Çizmja, 28 vjeç; të tre këta të akuzuar për trafik droge, gjatë operacionit të koduar "Romano" që është zhvilluar në Itali në vitin 2017; Athanas Xhuveli, 27 vjeç, i akuzuar për plagosje dhe vjedhje me dhunë, i cili për 3 vjet i shpëtoi ekstradimit, pasi u arrestua dhe u dënua për një tjetër vepër penale në Tiranë; Luan Delaj, 50 vjeç dhe Emiljano Mustafa, 31 vjeç, të dy të akuzuar për trafik droge, gjatë operacionit të koduar "Transporter", që u zhvillua në vitin 2018; Xhimi Isiu, 36 vjeç, i akuzuar për trafik droge, gjatë operacionit të koduar "Smoke Snake"; Renuar Nikolli, 30 vjeç, i akuzuar për vjedhje dhe tregti me mall të grabitur; Maliq Hyka, 72 vjeç, i dënuar nga Gjykata e Milanos për trafik heroine.