Prapaskenat, 3 eurodeputetë presion PS- së për paktin e 5 qershorit, deklarata fshihet natën nga faqja e PE- së
ÇFARE NDODHI DJE ME DEKLARATEN QE U HOQ NGA FAQJA ONLINE. PD: SI PO SHKELET PAKTI
Partia Demokratike akuzoi Kryeministrin Edi Rama se me nismën për ndryshimin e dy neneve të Kushtetutës, atë 64 dhe 68, po minon marrëveshjen e firmosur në Këshillin Politik më 5 qershor, në prani edhe të ndërkombëtarëve.
Sekretari i Përgjithshëm i Partisë Demokratike, Gazment Bardhi, doli dje për të dytën ditë radhazi, duke sqaruar se si zhbëhet automatikisht marrëveshja e firmosur edhe nga përfaqësuesi i maxorancës. Sipas Bardhit, ndryshimi i nenit 68 të Kushtetutës nga “Kandidatët për deputetë paraqiten në nivel zone zgjedhore nga partitë politike, koalicionet zgjedhore të partive politike, si dhe nga zgjedhësit”, që është aktualisht, në riformulimin “Kandidatët për deputetë paraqiten në nivel zone zgjedhore nga partitë politike ose nga zgjedhësit”, që propozohet të behet nenin 68 të Kushtetutës imponon në mënyrë automatike ndërhyrjen në amendimet e dakordësuara në Këshillin Politik për Kodin Zgjedhor. Duke qenë se në hierarkinë e ligjeve shqiptare Kushtetuta qëndron më lart se ligji për zgjedhjet, atëherë heqja e koalicioneve në Kushtetutë imponon që të ndërhyhet edhe në Kodin Zgjedhor për ta hequr mundësinë e organizimit parazgjedhor të partive politike.
MARRËVESHJA
Sekretari i Partisë Demokratike, Gazment Bardhi, përmes citimit të disa neneve të draftit të dakordësuar në prani të ambasadorëve, mes maxhorancës dhe opozitës së bashkuar për Reformën Zgjedhore, tregoi se si Kryeministri Rama ka ndryshuar mendje brenda një muaji. Sipas Bardhit, në qershor të këtij viti Partia Socialiste ka qenë dakord për koalicionet zgjedhore dhe këtë ai e konfirmoi, duke cituar nenin 19 të marrëveshjes. “Për partitë pjesëtare të koalicionit që garojnë me lista shumemërore të veçanta, numri i kandidatëve në listën shumemërore nuk mund të jetë më i vogël se gjysma e numrit të mandateve që do të zgjidhen në zonën zgjedhore përkatëse, shtuar dy”, thuhet në nenin 19 të marrëveshjes. Ndërkohë, nëse Parlamenti do të ndryshojë Kushtetutën, ky nen do të duhet të ndryshohet, sipas Gazment Bardhit. Një tjetër nen që lejon koalicionet parazgjedhore në marrëveshjen e firmosur më 5 qershor e që do të duhet të ndryshohet automatikisht nëse miratohen ndryshimet kushtetuese që nuk lejojnë koalicionet parazgjedhore, është neni 36 i marrëveshjes. “Në rastin kur është shteruar lista e kandidatëve të partisë politike, anëtare e një koalicioni, mandati i kalon partisë së koalicionit me herësin më të lartë”, sanksionohet në draftin e dakordësuar nga këshilli politik i Reformës Zgjedhore e që Kryeministri Rama ka deklaruar këto dy ditë se do ta miratojë pa ndryshime.
PARALAJMËRIMI
Më tej, Sekretari i Përgjithshëm i PD- së, Gazment Bardhi, paralajmëroi kreun e qeverisë se përmes mostërheqjes nga nisma për ndryshimin e Kushtetutës në mënyrë të njëanshme, rrezikon stabilitetin e vendit dhe t’i mbyllë derën Shqipërisë në Bashkimin Europian. “Me prishjen e marrëveshjes së 5 qershorit, ai po kërcënon rëndë stabilitetin e vendit dhe të ardhmen europiane të Shqipërisë. Opozita e bashkuar mbështet plotësisht qëndrimet e qarta të Sekretarit amerikan të Shtetit, Përfaqësuesit të Lartë të Bashkimit Europian, Komisionerit për Zgjerimin dhe Bundestagut, si dhe rikonfirmon se i qëndron plotësisht kodifikimit pa asnjë ndryshim të dakordësisë së 5 qershorit”, theksoi Bardhi, ndërkohë që i bëri thirrje qeverisë që të miratojë sa më parë paktin PS- PDLSI për Reformën Zgjedhore.