COVID- 19 i merr jetën 21- vjeçares, në 24 orët e fundit 5 humbje jete
E reja vuante nga hipertensioni, diabeti e kolesteroli. Humb betejën në ditën e lindjes edhe 49- vjeçar ja nga Kruja
Nuk ka mjaftuar mosha e re për të mposhtur COVID19. Një 21- vjeçare ka humbur betejën me sëmundjen mëngjesin e së mërkurës. E shtruar prej disa ditësh në Spitalin Infektiv, e reja nuk ka mundur t’ia dalë, kjo për shkak edhe të kushteve shëndetësore.
Sipas Ministrisë së Shëndetësisë, 21- vjeçarja vuante nga sindromi metabolik, gjë që ka rënduar gjendjen e saj shëndetësore. Sindroma metabolike përfshin hipertensionin, diabetin dhe nivelet e larta të kolesterolit ose triglicerideve që paraqiten së bashku, duke rritur rrezikun e sëmundjeve të zemrës, goditjes në tru dhe diabetit. Dje, po ashtu, si pasojë e koronavirusit kanë humbur jetën edhe 3 pacientë të tjerë, në moshë relativisht të re. Një 49- vjeçare nga Kruja, nënë e 7 fëmijëve, ndërroi jetë dje në ditën e saj të lindjes. Në mëngjes, ministrja Manastirliu postoi një foto të saj duke u bërë apel qytetarëve që të mos nënvlerësojnë masat anti- COVID. Por dy orë më vonë, Ministria e Shëndetësisë raportoi lajmin për ndarjen e saj nga jeta. “Situata paraqitet e rënduar në Spitalin Infektiv, ku janë shënuar 4 humbje jete në 24 orët e fundit. Mëngjesin e sotëm ka ndërruar jetë një vajzë e re 21vjeçare, e cila ndodhej në terapi intensive e intubuar, si pasojë e simptomave të rënda të COVID- 19. Gjendja e saj u rëndua në mënyrë të menjëhershme si pasojë e tromboembolisë fulminante dhe pavarësisht përpjekjeve maksimale të stafit mjekësor, e reja që vuante nga sindromi metabolik, nuk ka arritur të mbijetojë. Gjatë 24 orëve të fundit e kanë humbur betejën me sëmundjen edhe një qytetare 49- vjeçare nga Kruja, e intubuar në gjendje të rëndë prej 11 ditësh dhe dy qytetarë, 56 dhe 67 vjeç, nga Tirana, të intubuar, të cilët nuk e kanë fituar dot betejën me virusin e rrezikshëm, megjithë përpjekjet e mëdha qe po bën stafi mjekësor”, tha një ditë më parë Mirela Cami, drejtore e Operatorit të Shërbimeve të Kujdesit Shëndetësor. Në orët e pasdites është regjistruar një tjetër humbje jete, bëhet fjalë për një 49- vjeçar nga Tirana, por që ende nuk është konfirmuar nga Ministria e Shëndetësisë. Referuar të dhënave zyrtare janë 103 persona që kanë ndërruar jetë si pasojë e COVID- 19 në vendin tonë që nga fillimi i pandemisë. Situata në spital Vijon të rëndohet situata në spital, ku aktualisht gjenden të shtruar 88 pacientë. “Vijon të ketë shtrime të reja në Spitalin Infektiv dhe situata paraqitet shumë serioze. Aktualisht janë të shtruar 88 pacientë në spital, 12 pacientë janë në terapi intensive dhe 4 prej tyre janë të intubuar në gjendje të rëndë” tha më tej Cami. Për të përballuar situatën e krijuar, dje është hapur edhe spitali COVID2. Sanatoriumi është rikthyer sërish në shërbim të të infektuarve dhe dje janë transferuar 6 pacientët e parë. Ministrja Manastirliu tha se Infektivi dhe Sanatoriumi do të shërbejnë për të trajtuar rastet e rënda, pra, që shfaqin komplikacione. Ndërsa ish- Kirurgjitë ( COVID3) dhe ambientet e universitetit “Kristal” ( COVID- 4) do të jenë në shërbim të pacientëve që shfaqin simptoma të lehta.
RASTET E REJA Dje janë raportuar 85 raste pozitive me COVID- 19, pjesa më e madhe në kryeqytet, ku edhe dje janë regjistruar 44 të infektuar. Ndryshe nga dy ditët e para të javës, të mërkurën Ministria e Shëndetësisë ka ulur edhe numrin e testimeve. Në 24 orët e fundit janë kryer vetëm 361 teste. “Gjatë 24 orëve të fundit janë kryer 361 testime për të dyshuar të prekur me COVID- 19, nga të cilat janë konfirmuar 85 raste pozitive. Shpërndarja gjeografike e rasteve është si vijon: 44 raste në Tiranë, nga 6 raste në Shkodër, Krujë, Vlorë, 5 në Tropojë, 3 në Elbasan, nga 2 raste në Durrës, Kurbin, Lezhë, Mirditë, Kolonjë, nga 1 rast në Has, Berat, Kamzë, Pogradec, Ura Vajgurore. Në 24 orët e fundit janë shëruar 29 qytetarë, duke e çuar në 2091 numrin e të shëruarve që nga fillimi i epidemisë. Në vendin tonë, aktualisht janë 1560 persona aktivë me COVID19, kryesisht në Tiranë, Shkodër, Krujë, Durrës”. Në mesin e të infektuarve është edhe një punonjëse e Gjendjes Civile në Vlorë, gjë që ka sjellë edhe pezullimin e shërbimit në këtë qytetet, për shkak të karantinimit të stafit për një periudhë 2- javore. Edhe dje, Ministria e Shëndetësisë përsëriti apelin ndaj bizneseve dhe institucioneve që të zbatojnë me korrektësi protokollet e sigurisë në punë, të miratuara nga autoritetet shëndetësore. “Kur është e mundur të lejojnë punonjësit të punojnë nga shtëpia për të minimizuar kontaktin mes tyre dhe përhapjen e infeksionit”, tha më tej Cami.