Basha takon sot në selinë blu aleatët dhe ambasadorët e BE
Kryedemokrati Lulzim Basha dhe aleatët e tij takojnë sot ambasadorët e shteteve të Bashkimit Europian në selinë blu. Mësohet se takimi është lënë në orën 8 e 45 të kësaj të marte. Ndërkohë, po të njëjtat burime, bëjnë me dije se opozita e bashkuar do të informojë selitë diplomatike në lidhje me veprimet e qeverisë dhe Bashkisë së Tiranës mbi procedurën e ndjekur për shembjen e teatrit. Po ashtu, pjesë e diskutimit do të jetë edhe Reforma Zgjedhore, e cila ishte planifikuar që të përfundonte më 15 mars, por ky afat u thye për shkak të pandemisë botërore të Covid- 19. Ndërkohë, paraprakisht tashmë është dakordësuar nga përfaqësuesit politikë që drafti i Reformës Zgjedhore të jetë gati në fund të majit. Takimi vjen në një kohë kur në mbledhjen urgjente që kryedemokrati Basha zhvilloi me aleatët mesditën e së dielës, kryetarja e LSI- së, Monika Kryemadhi, ka kërkuar që të mbahet një qëndrim ndaj selive diplomatike në Tiranë, të cilat, sipas saj, heshtën në lidhje me shembjen e Teatrit. Kjo kërkesë shkaktoi një diskutim mes dy kryetarëve, Kryemadhi dhe Basha, pasi ky i fundit ishte kundër kësaj ideje dhe sugjeronte që ndaj selive diplomatike të ketë një qëndrim më zyrtar, në mënyrë që të mos marrin kosto në lidhje me raportet me ndërkombëtarët. Po ashtu, sa i përket çështjes së Reformës Zgjedhore, pas shembjes së Teatrit, kryedemokrati Basha ka marrë propozime për të dalë nga këshilli politik, si nga aleatët, por edhe nga ish- deputetët e PD- së. Në mbledhjen e ditës së diel me aleatët, burimet i thanë gazetës "Panorama", se kryetari i PDIU- së i kërkoi Bashës që të braktisej këshilli politik i Reformës Zgjedhore me arsyetimin se Kryeministri Rama, sipas Idrizit, siç bëri me Teatrin, do të veprojë edhe me Reformën Zgjedhore dhe zgjedhjet. Por edhe kjo ide e hedhur nga kreu i PDIU- së u rrëzua prej kreut të selisë blu, i mbështetur edhe nga kreu i republikanëve, Fatmir Mediu. Këta të fundit e konsideruan ngritjen e këshillit politik një fitore të opozitës dhe se nuk mund të tërhiqen nga funksionimi i një instrumenti, të cilin e ka kërkuar po opozita për të finalizuar reformën.