Mungesa në gjykatat e posaçme do plotësohen me gjyqtarë nga rrethet
KLGJ: Gjyqtarët për procese të veçanta do zgjidhen me short mes atyre që kanë kaluar vetingun dhe kanë 10 apo 7 vite eksperiencë
Këshilli i Lartë Gjyqësor i ka dhënë zgjidhje ngërçit të krijuar në gjykatat e posaçme, sa i takon komandimit të gjyqtarëve të rretheve në shqyrtimin e disa çështjeve të veçanta.
Kujtojmë se pas shkrirjes së Gjykatës së Krimeve të Rënda, disa procese në Apel dhe Shkallë të Parë nuk po zhvilloheshin, pasi trupat gjykuese ishin të plotësuara me gjyqtarë të rretheve. Duke mos i konsideruar të posaçëm, avokatët ngritën pretendime për gjykimin prej tyre. Një nga proceset më problematike ishte ai ndaj Emiljano Shullazit, i cili që prej dhjetorit nuk është zhvilluar për këtë shkak, por edhe ai ndaj anëtarit të grupit të Habiljave, Armand Koçerri. Këshilli i Lartë Gjyqësor ka bërë ndryshime në vendimin për "Rregullat dhe procedurën e caktimit të gjyqtarit në gjykimin e çështjeve të veçanta", duke shtuar se gjyqtarët e rretheve mund të caktoheshin në Gjykatën e Posaçme, duke plotësuar dy kushte: vetingun dhe eksperiencën. "Në kuadër të mirëfunksionimit të sistemit gjyqësor, duke vlerësuar problematikat e paraqitura nga gjykatat e posaçme për korrupsionin dhe krimin e organizuar mbi situatën e krijuar nga vakancat në këto gjykata, që kanë sjellë pezullimin e disa proceseve gjyqësore të caktuara, Këshilli vendosi miratimin e ndryshimeve në vendimin nr. 30, datë 14.02.2019, "Për rregullat dhe procedurën e caktimit të gjyqtarit për gjykimin e një çështje gjyqësore të veçantë, në një gjykatë tjetër, të ndryshme nga ajo ku ushtron funksionin në mënyrë të përhershme", njoftoi KLGJ.
NDRYSHIMET
Në vendimin e KLGJ- së parashikohet se gjyqtarët që caktohen në Gjykatën e Posaçme të Shkallës së Parë për Korrupsionin dhe Krimin e Organizuar për çështje gjyqësore të veçanta, përzgjidhen me short ndërmjet gjyqtarëve të gjykatave të shkallës së parë me juridiksion të përgjithshëm, të cilët kanë të paktën 7 vjet përvojë në ushtrimin e profesionit, nga të cilat të paktën pesë vjet si gjyqtarë në fushën e drejtësisë kriminale, si dhe kanë kaluar me sukses procesin e rivlerësimit kalimtar. Ndërkohë, gjyqtarët që caktohen në Gjykatën e Posaçme të Apelit për Korrupsionin dhe Krimin e Organizuar për çështje gjyqësore të veçanta, përzgjidhen me short ndërmjet gjyqtarëve të gjykatave të Shkallës së Parë dhe Apelit me juridiksion të përgjithshëm, të cilët kanë të paktën 10 vjet përvojë në ushtrimin e profesionit, nga të cilat të paktën pesë vjet si gjyqtarë për çështjet penale, si dhe kanë kaluar me sukses procesin e rivlerësimit kalimtar.
PENGESAT
Gjyqtarët që tashmë janë pjesë e gjykatave të posaçme, si në Apel dhe në Shkallë të Parë kanë dhënë miratimin për heqjen dorë nga privatësia e tyre dhe të familjes. Këtyre gjyqtarëve i kontrollohen llogaritë dhe komunikimet që kryejnë, ndërsa një pjesë janë ende në procesin e vetingut. Këto kushte të pranuara prej tyre dhe fakti që GJKKO, ishte një organ i ri dhe i konsideruar superior, u ngrit problemi i gjyqtarëve që vinin nga gjykatat e rretheve me juridiksion të përgjithshëm, nëse mund të gjykonin çështje që ishin pjesë e gjykatave të posaçme. Kështu, pas dy muajsh shqyrtimi të problematikës, KLGJ- ja, e cila kërkoi edhe ndryshime ligjore për të bërë të mundur lehtësirat në komandimin e gjyqtarëve, i dha një zgjidhje, që mund të shmangë edhe pasoja të tjera që procesi i vetingut mund të sjellë në Gjykatën e Posaçme. Nga vendimet e fundit të Komisionit të Pavarur të Kualifikimit( KPK), në këtë të fundit janë krijuar vakanca të reja, ndërsa procesi vetingut për një pjesë të tyre ende nuk ka përfunduar.