Mungesat, KLGJ hap garën për 6 anëtarë të Gjykatës së Lartë
Gjyqtarët kërkohen për të drejtën civile dhe administrative
Këshilli i Lartë Gjyqësor ka hapur garën për 6 anëtarë në Gjykatën e Lartë, 3 për të drejtën civile dhe 3 të tjerë për të drejtën administrative.
Njoftimet për shpallje interesi janë bërë më 28 shkurt, ndërsa për dy vende bosh që vijnë nga radhët e Gjyqësorit, të interesuarit kanë dy javë afat për të aplikuar. Për dy vende të tjera, aplikantët kanë afat 2 muaj ndërsa për dy të tjerat, 5 muaj. Disa ditë më parë, KLGJ- ja dërgoi në Presidencë emrat për të bërë emërimin e 3 gjyqtarëve që vijnë nga bota akademike dhe pritet që ata të jenë gjyqtarët e parë të Gjykatës së Lartë, që pas shkrirjes ka në përbërjen e saj vetëm Ardian Dvoranin.
KRITERET
Sipas Këshillit të Lartë Gjyqësor, kandidati për anëtarë në Gjykatën e Lartë duhet të ketë ushtruar funksionin e gjyqtarit jo më pak se trembëdhjetë vjet në nivele më të ulëta, nga të cilat të paktën pesë vjet në fushën e kërkuar, duke përfshirë edhe përvojën si magjistrat i komanduar. Kandidati duhet të kalojë me sukses procesin e verifikimit të pasurisë dhe të figurës, duhet të mos ketë masë disiplinore në fuqi dhe duhet të mos jetë në situatën e papajtueshmërisë ambientale. Pas aplikimit, gjyqtarët i nënshtrohen procesit të verifikimit të plotësimit të kritereve ligjore të kandidimit. Pas verifikimit të kritereve ligjore, fillon procesi i vlerësimit etik dhe profesional. Në bazë të verifikimeve dhe vlerësimeve që do të kryhen, KLGJ- ja bën pikëzimin dhe dërgon emrat në Presidencë për emërim. "Në procedurën e ngritjes në detyrë, sipas këtij vendimi, mund të konkurrojë çdo gjyqtar që është në një pozicion në sistemin gjyqësor ose në një pozicion të komanduar, i cili plotëson kriteret ligjore të emërimit në Gjykatën e Lartë", shkruhet në vendimin e KLGJ- së.
GJYKATA E LARTË
Gjykata e Lartë duhet të ketë 19 anëtarë të emëruar në detyrë me Dekret të Presidentit të Republikës dhe të propozuar nga Këshilli i Lartë Gjyqësor. Në mbledhjen e zhvilluar në 5 mars, KLGJ- ja njoftoi se nisi procedurat për përzgjedhjen e kandidatit të katërt për këtë Gjykatë, e cila ka një ngarkesë prej më shumë se 35 mijë dosjesh në pritje të shqyrtimit. "Këshilli i Lartë Gjyqësor po vijon procedurën e verifikimit të kushteve dhe kritereve ligjore të kandidimit për kandidatin për pozicionin e katërt nga radhët e juristëve të spikatur, si edhe vendosi në mbledhjen e datës 26.2.2020 hapjen e procedurës së ngritjes në detyrë në Gjykatën e Lartë, nga radhët e gjyqtarëve, për plotësimin e pozicioneve të tjera të lira në Gjykatën e Lartë", njoftoi KLGJ- ja, një javë më parë.
ANËTARËT E KUSHTETUESES
Ngritja e Gjykatës së Lartë do të bëjë të mundur edhe plotësimin e Gjykatës Kushtetuese, e cila aktualisht është me 4 anëtarë, 3 të propozuar nga Presidenca dhe Kuvendi. Ndërkohë që Këshilli i Emërimeve në Drejtësi është duke punuar për plotësimin me 2 anëtarë të tjerë, mungesa e Gjykatës së Lartë pengon edhe plotësimin e Kushtetueses me 9 anëtarë. Gjykata e Lartë duhet të propozojë 3 kandidatët e saj për plotësimin e 3 vendeve dhe kjo bëhet vetëm me funksionimin e saj me të gjitha kapacitetet. Ligji parashikon se tre anëtarë të Kushtetueses "emërohen nga Presidenti i Republikës, tre anëtarë zgjidhen nga Kuvendi dhe tre zgjidhen nga Gjykata e Lartë. Gjyqtarët e Gjykatës Kushtetuese qëndrojnë në detyrë për 9 vjet, pa të drejtë riemërimi".