Vendimi, kushtet e reja për të përfituar bursë
Jo më tre, mjaftojnë dy vite punë në administratë pas rikthimit
Ekselentët që duan të kryejnë studimet universitare jashtë vendit, janë të lirë ta bëjnë, por pa mbështetjen e shtetit. Ndryshe nga më parë, Këshilli i Ministrave ka marrë vendimin e ri për dhënien e bursave, duke hequr këtë kategori nga fasha e përfituesve dhe duke lënë në fuqi vetëm studentët që duan të bëjnë një specializim master apo doktoraturë. Veç kësaj, edhe fondi fiks prej 150 milionë lekësh, i pandryshueshëm në vite për ekselentët që duan të zhvillojnë dijet e tyre jashtë, është hequr. Kur vjen puna te kthimi i restos, kontributi në vend, qeveria është treguar më dorëlëshuar. Nga tri vite punë të detyrueshme pas kryerjes së studimeve me mbështetjen e qeverisë, ekselentit i mjaftojnë dy vite punë në administratë, jo tri sa ç’ka qenë më parë, për t’i kthyer “borxhin” shtetit për mbështetjen e dhënë. “Studentët, të cilët ndjekin studimet e plota të doktoratës, pasi kanë përfunduar ciklin e parë e të dytë të studimeve universitare, pranojnë të kthehen dhe të punojnë në institucionet e administratës buxhetore shtetërore dhe institucionet e pavarura publike në Shqipëri, për së paku 2 ( dy) vjet, pas përfundimit të studimeve të doktoratës në fushën e studimeve të kryera”, citohet një ndër kushtet e përfitimit të bursës, nga vendimi, i cili penalizon ata që nuk e respektojnë. Mesatarja mbi 9 e të gjitha viteve të shkollimit të mesëm vijon të mbetet kushti kryesor për ata që aspirojnë të studiojnë jashtë vendit nëpërmjet këtij programi. Por, ky nivel vlen vetëm për profile të vështira, si shkencat e natyrës dhe ato teknike. Profilet shoqërore dhe ato ekonomike kërkojnë mesatare jo më të ulët se 9.5. Tjetër kusht për të përfituar mbështetjen monetare të qeverisë është mospërfitimi paralel i asnjë lloj burse tjetër. Edhe kur ekselenti përfiton bursë të pjesshme nga universiteti i vendit pritës dhe i takon ta përfitojë edhe nga shteti shqiptar, ky i fundit, sipas vendimit, paguan vetëm masën plotësuese të bursës së plotë. “Për kandidatin që plotëson kriteret e njërës prej kategorive të përcaktuara në pikën 2, të këtij vendimi, në rastet kur përfiton një financim të pjesshëm nga universiteti pritës apo nga donatorë të tjerë, financimi nga Fondi i Ekselencës do të bëhet për diferencën e vlerës, deri në vlerën maksimale të parashikuar nga universiteti pritës, për vitin akademik, për shpenzime si tarifa e regjistrimit dhe/ ose shpenzime të tjera të jetesës e udhëtimit, në varësi të masës së fondit në dispozicion”. Përfituesi ka për detyrë ta kthejë bursën, në rast se përjashtohet nga universiteti, ndërpret studimet për të cilat është mbështetur financiarisht, nuk respekton rregullin e punësimit në administratë, sipas kushtit që vendos qeveria, apo nuk mbyll studimet në kohë. Pas miratimit të vendimit, brenda një muaji, ministria duhet të nxjerrë udhëzimin me rregullat e hollësishme të aplikimi dhe afatet.