IKMT në mbrojtje të mjedisit, Lleshaj: Nuk dua kanabis
Inspektorati Kombëtar i Mbrojtjes së Territorit tashmë nuk do të ketë veprimtari vetëm në mbrojtjen e territorit, por edhe në mbrojtjen e mjedisit, kryesisht të ujit, tokës dhe pyjeve, me theks te pyjet. Ky fakt u bë i ditur nga ministri i Brendshëm, Sandër Lleshaj, i cili dje zhvilloi një takim me prefektët, strukturat drejtuese të IKMT dhe strukturat vendore e qendrore në Policinë e Shtetit. Takimi erdhi pas miratimit të vendimit në Qeveri, që transferon përgjegjësinë për kontrollin e mjedisit dhe pyjeve nga MTM te Ministria e Brendshme. "Qeveria ka ndërmarrë në funksion të pajisjes ose ngarkimit të Ministrisë së Brendshme me disa detyra të shtuara të reja, për sa i përket kontrollit të territorit dhe mjedisit. Ndryshimet konsistojnë në një zgjerim të fushës së përgjegjësisë të Ministrisë së Brendshme, edhe me funksionet e parandalimit, mbrojtjes dhe mbikëqyrjes, kontrollit dhe zbatimit të legjislacionit në fuqi për mbrojtjen e tokës, ajrit, ujërave dhe pyjeve nga ndotja, dëmtimet apo ndërhyrjet e paligjshme", tha Lleshaj. Ministri u shpreh se, "ky ndryshim synon që të rrisë fuqinë parandaluese të institucioneve tona në mbrojtjen e mjedisit në vend, të godasë veprimtarinë e paligjshme dhe të sigurojë që vendi të zhvillohet në kushte normale sa i përket mjedisit, për të siguruar edhe parakushtet e tjera të domosdoshme për zhvillimin e ekonomisë, turizmit dhe të tjera". Lleshaj vuri theksin edhe tek angazhimi në kuadër të luftës për parandalimin e kultivimit të kanabisit. "Dua të them që viti që shkoi, ka paraqitur një nivel shumë të fortë angazhimi të institucioneve, i cili është reflektuar në numrin e madh të operacioneve të Policisë të zhvilluara; në numrin e lartë të personave të proceduar penalisht; në numrin e konsiderueshëm të mjediseve të kontrolluara; në numrin e bimëve të kanabisit të sekuestruara etj. Pra, ka një volum të lartë, por viti i kaluar na ka dëshmuar edhe një numër të lartë të goditjes ndaj zyrtarëve që kanë përgjegjësi për kontrollin e territorit", tha Lleshaj. "Në qoftë se vjet kishim vendosur qershorin si datë fundore, pas së cilës mbaronte puna e Policisë dhe fillonte përgjegjësia e saj, sivjet ky afat është tërhequr më para, pra, duhet të jetë prilli afati, në të cilin drejtuesit e Policisë duhet ta kenë mbyllur përpjekjet e tyre në luftën kundër kanabisit", tha Lleshaj. "Duhet ta kenë mbyllur brenda muajit prill dhe pas këtij muaji do të fillojë pastaj kërkimi i përgjegjësisë edhe te radhët e zyrtarëve që kanë përgjegjësi për këtë. Çdo sipërfaqe e mbjellë me kanabis kudo që të jetë, do të shkaktojë automatikisht proces ndaj zyrtarëve personave, që kanë përgjegjësi për atë territor të caktuar. Duke filluar nga drejtuesit e pushtetit vendor, duke filluar nga drejtuesit e Policisë, nga drejtuesit e inspektorateve të pyjeve, flas tani, të bujqësisë e me radhë. Çdokush që është përgjegjës për territorin e vendit tonë, duhet të mbajë përgjegjësinë që ky territor të përdoret vetëm për qëllime të ligjshme ku kanabisi nuk përfshihet. Muaji prill duhet të jetë muaji ku secili prej jush prej nesh do të jetë i gatshëm për të dhënë llogari lidhur me punën e kryer", ka thënë ministri i Brendshëm.