Korrigjim tapive me 7501, Venecia rrëzon qeverinë
Zbardhet raporti i Venecias për ligjin e ri të pronave: Nuk ka qartësi dhe saktësi, të konsultohet me grupet e interesit
ZBARDHET RAPORTI/ Ekspertët e Komisionit të Venecias kanë rrëzuar ligjin e qeverisë “Për Përfundimin e Proceseve Kalimtare të Pronësisë”. Në raportin që zbardh sot gazeta, rrëzohet mundësia që qeveria të ndërhyjë për të korrigjuar tapitë e tokave me 7501. Çfarë kërkon Komisioni nga Parlamenti dhe ndryshimet e dy neneve të ligjit. Kategoritë që preken nga ligji
Ligji i qeverisë "Për përfundimin e proceseve kalimtare të pronësisë" nuk e kalon klasën.
Komisioni i Venecias ka bërë publik dje raportin për draftin, duke e cilësuar atë të paqartë dhe me mungesë saktësie. Ky qëndrim vjen në përgjigje të kërkesës së bërë nga kreu i Kuvendit Gramoz Ruçi në maj të këtij viti, ku kërkohej opinioni i Venecias veçanërisht për dy nene të ligjit, përkatësisht nenin 7 dhe nenin 9, në të cilat parashikohet rishikimi i tapive të dhëna me 7501.
RAPORTI Dalja në një konkluzion duket se nuk ka qenë detyrë e lehtë për Komisionin, nisur kjo nga ajo çfarë ka ndodhur në këto tri dekada, ku ndryshimet e njëpasnjëshme ligjore sipas oreksit të çdo qeverie, jo vetëm nuk e kanë zgjidhur situatën, por e kanë futur në një kolaps të pashoq me kosto për vendin dhe qytetarët. Raporti 23 faqe është një dëshmi e asaj çfarë ka ndodhur, që nga ndryshimet e ligjit, mungesa e hartave e deri te konfliktet e pronësisë dhe përplasja në gjykatë. Që në nisje të tij vihet në dukje ky handikap i krijuar. "Të drejtat e pronës në Shqipëri përbëjnë një nga çështjet më të ndërlikuara pas ndryshimit të regjimit në 1990, duke penguar zhvillimin ekonomik të vendit. Kuadri ligjor mund të konsiderohet më së miri si e fragmentuar, kompleks dhe jokoherent. Pjesa më e madhe e problemeve, me të cilat Shqipëria përballet aktualisht në fushën e të drejtave pronësore, e ka origjinën në ligjet e para të miratuara në fillim të viteve ' 90 të shekullit të kaluar. Procesi në lidhje me pronat nuk filloi me kthimin e tyre te pronarët që i kishin, ndryshe nga vendet e tjera", thuhet në raport. Sipas Venecias, pas shembjes së regjimit, toka jo vetëm nuk u kthye tek i zoti, por u nda në 2 milionë parcela. Pronarët, ende sot pas tri dekadash, nuk kanë marrë atë çka u takonte, sikundër ka ndodhur në vende me një të kaluar të ngjashme. Duke u distancuar nga mbajtja e një qëndrimi për "Ligjin për kompensimin e pronave", Komisioni thotë se vlerësimin për të do ta japë Gjykata e Strasburgut. Ndërkohë lidhur me nenet 7 dhe 9, të ligjit “Për përfundimin e proceseve kalimtare të pronësisë” për të cilat u kërkua mendim nga pala shqiptare, Venecia argumenton se këto dy nene janë të paqarta, në thelb i gjithë ligji ka paqartësi dhe pasaktësi. "Projektligji në versionin e tij aktual nuk ka qartësi dhe saktësi për shkak të mungesës së përkufizimeve dhe fuqisë rregulluese shumë të gjerë që i njeh Këshillit të Ministrave, mungesa e hapave themelore procedurale dhe afatet e përcaktuara qartë për mbajtësit e titujve. Ekziston një rrezik i lartë që projektligji mund të ngrejë çështje të pajtueshmërisë me nenin 1 të protokollit të parë të KEDNJ, si dhe me Kushtetutën shqiptare. Në veçanti, nenet 7 dhe 9 të projektligjit janë në thelb të paqarta dhe të pasakta dhe për këtë arsye, paraqesin një rrezik të lartë që zbatimi i tyre do të çojë në shkelje të Konventës Europiane për të Drejtat e Njeriut", thuhet në përfundim të raportit, ku rekomandohet rishikimi i ligjit në tërësi dhe konsultimi i tij me grupet e interesit.
LIGJI Dy nenet, për të cilat u kërkua opinioni i Venecias, konkretisht neni 7 dhe neni 9, kanë fuqi prapavepruese, çka do të thotë se përmes tyre, Agjencia e Kadastrës fitonte të drejtën për të korrigjuar apo shfuqizuar edhe titujt e pronësisë të dhëna ndër vite me anë të ligjit 7501. Thënë ndryshe, me miratimin e tij do të niste një fazë e re verifikimi, duke skanuar çdo certifikatë pronësie të dhënë ndër vite, si edhe procedurat për rastet e konstatuara me parregullsi apo abuzive