Majko: Partia Demokratike të rikthehet në sistem
"Të fillojë me ankimimin në Kushtetuese, të vazhdojë me Reformën
Ministri i Shtetit për Diasporën, Pandeli Majko, ka bërë një propozim të fortë për të dalë nga gjendja politike ku ndodhet vendi, pas largimit të opozitës nga vendet e saj në Parlament. Në fjalën e tij në Parlament, Majko u shpreh se opozita duhet t'i rikthehet sistemit politik, pasi, sipas tij, kjo është e vetmja mundësi që demokracia të jetë funksionale. "Procesi politik i muajve të fundit pohoi pamundësinë e maxhorancës për të mos u tërhequr nga proceset politike, ajo është e dënuar të zgjedhë Kushtetutën përpara dëshirave politike. Opozita në Parlament reagon me nervozizëm për çdo mundësi dialogu me opozitën jashtë. Aktualisht, opozita jashtëparlamentare është e qartë vetëm për atë që nuk do. Edi Rama mund të jetë problemi i opozitës, por ai është i pamjaftueshëm si arsye për ta barazuar me vetë sistemin. Cilido opozitar që ndjen se nuk fiton përballë Ramës pas dy mandatesh të tij, duhet ta nisë shpjegimin jo nga ai, por nga vetja. Çdo individ që blen votat, do të mbetet i tillë, si kur është Kryeministër, ashtu edhe kur është vetëm kryetar partie. Barazimi i sistemit me qëllimin politik është gabim. Ai do të vetëkufizojë opozitën dhe do të verë në provë maxhorancën", tha Majko. Më tej, ministri Majko lëshoi akuza në drejtim të PD- së se ka devijuar nga rrënjët e saj dhe duhet të rishikojë pozicionin e saj në lidhje humbjen dhe rikthimi tek institucionet janë e vetmja alternativë për të. Sipas tij, duhet të rishikohen ndryshime Kushtetuese që ashpërsojnë dënimet edhe penalisht për ata që dalin nga sistemi. "Partia që u krijua nga studentët sot duhet të pyesë veten, se përse nuk po bëhet një alternativë që të japë votën për të ardhmen e Shqipërisë. Pjesëmarrja në sistem e bëri dhe e bën një parti politike. Ka ardhur koha për të diskutuar edhe ndryshimin e Kushtetutës. Kush e braktis sistemin, duhet të paguajë jo vetëm politikisht, por edhe me ekzistencën legale. PD duhet të rikthehet në sistem. Procesi duhet të fillojë me ankimimin në Gjykatën Kushtetuese, duhet të vazhdojë me Reformën Zgjedhore. Ne u detyrohemi këtyre burrave dhe grave që nuk braktisën përgjegjësinë për të qenë në Kuvend. Negociata me ta ka rëndësi dhe të mos kufizohemi në kushte teknike. Nëse Gjykata Kushtetuese rrëzon rezultatin e 30 qershorit, atëherë do shkohet në zgjedhje, të kesh frikë skenarët negativë është dramë personale. PD duhet të rikrijojë raportin e saj me humbjen. PD duhet të kthejë kokën pas", u shpreh Pandeli Majko.