Hajdutët ‘ sfidë’ Ministrisë së Brendshme, e vjedhin dy herë
Ngjarjet hetohen nga Prokuroria e Tiranës dhe Shërbimi për Çështjet e Brendshme dhe Ankesat, dyshohen të implikuar edhe punonjës Policie
Në një hark kohor prej afro 20 ditësh është vjedhur nga persona ende të paidentifikuar Qendra e Shërbimit dhe Administrimit të Mjeteve të Transportit, apo siç njihet ndryshe Parku i Ministrisë së Brendshme.
Vjedhja e parë rezulton të ketë ndodhur më 13 shtator, ndërsa e dyta gjatë natës së të mërkurës, më 2 tetor, por asnjëra nuk është raportuar zyrtarisht. Vetëm dje, pas publikimit të lajmit në disa media, Policia e Tiranës konfirmoi ngjarjen, duke deklaruar se janë vjedhur disa pajisje elektronike që kishin dalë jashtë përdorimit dhe ishin për t'u asgjësuar. Burimet thanë se materialet e vjedhura janë të nxjerra jashtë përdorimit pas rikonstruksionit të Ministrisë së Brendshme dhe janë vendosur në Park, pasi janë në procedurë të ankandit për t'u shitur për skrap. Në lidhje me ngjarjen e ndodhur te Rruga e Kavajës në Tiranë, kanë nisur hetimet Prokuroria dhe Shërbimi për Çështjet e Brendshme dhe Ankesat, pasi ka dyshime se mund të jenë të përfshirë edhe punonjës Policie. Minimalisht, efektivët dyshohen se mund të kenë shpërdoruar detyrën, deri në momentin që të provohet ose jo nëse janë të lidhur drejtpërdrejt me vjedhjet e ndodhura.
VJEDHJET Policia e Tiranës konfirmon dje lajmin se në magazinën e Qendrës së Shërbimit dhe Administrimit të Mjeteve të Transportit, në varësi të Ministrisë së Brendshme, ka pasur vjedhje, por pa specifikuar se kur ka ndodhur. Sipas burimeve zyrtare të Policisë, në Rrugën e Kavajës, persona ende të paidentifikuar kanë vjedhur në magazinën e Qendrës së Shërbimeve të Automjeteve të Transportit, në varësi të Ministrisë së Brendshme, disa pajisje elektronike të dala jashtë përdorimit, të cilat ishin për t'u asgjësuar. Por burimet thanë se aty janë marrë kondicionerë, printerë, skanerë etj.. Ndërsa në vjedhjen e mëparshme, atë të datës 13 shtator, dyshohet të jenë vjedhur disa pjesë automjetesh, të konsideruara si të dala jashtë përdorimi dhe që do të shiteshin për skrap, pasi të përfundonin procedurat e ankandit. Kjo nuk është hera e parë që Qendra e Shërbimit dhe Administrimit të Mjeteve të Transportit, në varësi të Ministrisë së Brendshme, bie pre e vjedhjeve. Madje, në rastin e prillit të vitit 2013, kur u vodh një sasi e madhe karburanti prej 12000 litrash dhe 4000 litrash vaj lubrifikant, pati edhe persona të arrestuar për shpërdorim detyre. Rasti në atë kohë ishte denoncuar nga vetë Ministria e Brendshme në Prokurorinë e Tiranës dhe në SHÇBA. Nga kontrolli i ushtruar nga auditi i brendshëm i Ministrisë së Brendshme, në QSHAMT janë konstatuar shkelje të rënda të ligjit dhe abuzime me pronën shtetërore, të parashikuara nga Kodi Penal. "Ishdrejtori i QSHAMT- së rezulton të jetë përgjegjës për nxjerrjen jashtë përdorimit, në shkelje të procedurave të parashikuara nga ligji, të dy automjeteve, një ' Mitsubishi Pajero', me targa TR 3330 K dhe një ' Wolksvvagen 4 Motion', me targa ' Policia 0391', me një vlerë të përgjithshme prej 7.451.957 lekësh", deklaronte në atë kohë Ministria e Brendshme.