Basha takon krerët e bashkive të djathta, Mziu: S’dalim nga zyra
Vendimi i kryebashkiakëvë, kreu i PD: Mziu është kryetar i Bashkisë Kamzë, 30 qershori është nul
Kryetari i Partisë Demokratike, Lulzim Basha, thirri në një takim kryetarët e bashkive të drejtuara nga të zgjedhurit e djathtë për të përcaktuar vijimin e aksionit opozitar.
Në një kohë kur Kolegji Zgjedhor injoroi kërkesën e demokratëve për të ndalur dhënien e mandateve pa u shprehur Gjykata Kushtetuese, PD dhe të zgjedhurit e saj vendorë në të gjithë bashkitë vendit janë të vendosur për të mos lëshuar zyrat e tyre. Qëndrimin e pandryshuar për këtë çështje e dha sërish kryebashkiaku i Kamzës, Xhelal Mziu. “Ajo që ne do të bëjmë është të vazhdojmë të qeverisim nga ato bashki derisa të kemi një vendim të Gjykatës Kushtetuese për ligjshmërinë ose jo të dekretit të Presidentit. Nuk kishte zgjedhje më datë 30 qershor. Ne do vazhdojmë punë deri në zgjedhjet e reja. Asnjë shans nuk ka që ne të lëshojmë zyrat”, deklaroi Mziu. Qëndrimin e prerë të kryebashkiakut të Kamzës e përforcoi edhe vetë Lulzim Basha, i cili, në dalje nga selia blu, konfirmoi se Mziu do vijojë të drejtojë bashkinë. “Xhelal Mziu është kryetari i Bashkisë Kamzë, 30 qershori është nul”, tha kreu i PD- së. Kryetarët e bashkive të djathta kanë zhvilluar takime të vazhdueshme me kryedemokratin Basha pas zgjedhjeve të 30 qershorit.
ANKIMIMI
Por krahas ultimatumeve për moslëshim të zyrave, të zgjedhurit vendorë nga radhët e opozitës kanë hapur edhe një betejë ligjore për të rrëzuar zgjedhjet e 30 qershorit. Në cilësinë e kryetares së Shoqatave të Bashkive, kryebashkiakja e Shkodrës, Voltana Ademi, ka paditur në Gjykatën Kushtetuese procesin e mbajtur në 30 qershor nga KQZ, në shkelje të dekretit të Presidentit Meta. Në kërkesë thuhet ndër të tjera se dihet se Gjykata Kushtetuese nuk funksionon, por shtohet se duke besuar te drejtësia dhe sugjerimet e faktorit ndërkombëtar, kërkohet mosnjohje e zgjedhjeve të 30 qershorit, duke i cilësuar ato të paligjshme. Shoqata e Bashkive të Shqipërisë ka kërkuar: Konstatimin antikushtetues të zgjedhshmërisë/ procesit zgjedhor të zhvilluar më 30 qershor 2019 për zgjedhjen e organeve të qeverisjes vendore, të kryetarëve të bashkive dhe anëtarëve të këshillave bashkiakë dhe si rrjedhojë, konstatimin antikushtetues të zgjedhjes së anëtarëve të këtyre organeve”, thuhet në kërkesë. Pritet që pas miratimit nga KQZ të tabelës përfundimtare të rezultateve të zgjedhjeve të 30 qershorit, demokratët të mblidhen sërish për të përcaktuar mënyrën sesi do të vijojë aksioni për mbrojtjen e bashkive të drejtuara nga e djathta. Ndërkohë që muajin e ardhshëm pritet edhe publikimi i raportit përfundimtar nga vëzhguesit e OSBE/ ODIHR në lidhje me procesin e 30 qershorit. Në raportin paraprak, ambasadorja e ODIHR, Andrey Glover, foli për parregullsi të mëdha përgjatë mbajtjes së procesit dhe mënyrës së menaxhimit të tij nga komisionerët e majtë.