Skema e doganierëve, si i ulnin vitet e makinave
Zbulohet skema në Durrës, doganierë e agjentë dogane merrnin ryshfet nga pronarë të mjeteve që paguanin pak për zhdoganim
Policia e Durrësit ka zbuluar një skemë, përmes së cilës doganierë dhe agjentë dogane falsifikonin dokumente për të ulur vitin e prodhimit të mjeteve dhe më pas i zhdoganonin ato me vlera shumë të ulëta monetare.
Duke zbatuar këtë skemë, ata përfitonin nga pronarët e makinave ryshfet për shërbimin që ofronin në favor të këtyre të fundit. Hetuesit kishin marrë informacion për këtë grup që vepronte në kundërshtim me ligjet shqiptare dhe kishin nisur hetime duke i mbajtur në vëzhgim personat e përfshirë.
HETIMI Nga hetimet rezultoi se, nëntë persona në bashkëpunim me njëri- tjetrin kishin ngritur infrastrukturën e nevojshme për të ushtruar aktivitetin e tyre të paligjshëm. Ata operonin në bashkëpunim duke favorizuar blerësit e makinave të vitprodhimeve të fundit, ku edhe vlera e zhdoganimeve është e madhe. Pikërisht për të shmangur këtë detyrim ndaj shtetit, personat bashkëpunonin me agjentët e doganës dhe doganierët, të cilët falsifikonin në dokumente vitin e saktë të prodhimit, duke e ulur atë. Policia kishte disa kohë që e kishte marrë një informacion të tillë dhe e kishte vënë në hetim çështjen derisa arriti të dokumentojë veprimtarinë e jashtëligjshme. Pasi dokumentuan me prova dhe fakte aktivitetin e paligjshëm, Policia ndërhyri dhe në kuadër të operacionit të koduar "Silent" u ndaluan tre shtetas. Gjithashtu, u ekzekutuan 5 masa sigurie në ngarkim të 5 personave fizikë, një masë sigurie në ngarkim të një personi juridik, si edhe u shpall në kërkim një shtetas tjetër.
ARRESTIMET Sipas Policisë, janë arrestuar: Erdi Çena 29 vjeç, banues në Durrës, Qani Kacmoli 32 vjeç, banues në Durrës dhe Glodjan Sulaj 35 vjeç, banues në Tiranë. Qe të tre kishin rolin e sekserit në lidhje me këtë skemë që funksiononte në Doganë. Gjithashtu, janë ekzekutuar edhe vendimet e Gjykatës së Rrethit Gjyqësor Durrës, ku janë vendosur masat e sigurisë në ngarkim të shtetasve të tjerë të përf- shirë. Bëhet fjalë për Kostandin Riston, 59 vjeç, me detyrë agjent doganor, ndaj të cilit është vendosur masa e sigurisë "Arrest shtëpie"; Mirjan Driza, 44 vjeç, me detyrë agjent doganor, është vendosur masa e sigurisë "Detyrim paraqitje pranë Oficerit të Policisë Gjyqësore, Neritan Bablusha, 49 vjeç, me detyrë doganier, është vendosur masa e sigurisë "Pezullimi i ushtrimit të një detyrë a shërbimi publik". Gjithashtu, për Endrit Pllumbin, 39 vjeç, banues në Tiranë, me detyrë doganier, është vendosur masa e sigurisë "Pezullimi i ushtrimit të një detyrë a shër- bimi publik", për Sokol Mehmetin, 51 vjeç, banues në Durrës, me detyrë doganier, është vendosur masa e sigurisë "Pezullimi i ushtrimit të një detyrë a shërbimi publik". Sipas Policisë, është shpallur në kërkim dhe po punohet për kapjen e shtetasit Xh. S. "Shtetasit e mësipërm, në bashkëpunim me njëri - tjetrin kanë sjellë mjete nga jashtë shtetit në vendin tonë dhe duke falsifikuar dokumentet kanë ulur vitin e prodhimit dhe i kanë zhdogan- uar. Në këtë mënyrë, vlera e zhdoganimit të mjeteve ka qenë më e ulët në vlera monetare se vlera normale bazuar në vitin e saktë të prodhimit të tyre", sqaron Policia. Po sipas Policisë, në ngarkim të një shoqërie tregtare, e cila funksiononte si agjenci doganore, është vendosur masa e sigurisë me karakter ndalues. "Ndalimi i përkohshëm i ushtrimit të veprimtarive të caktuara profesionale ose afariste", thuhet në njoftimin e dhënë.