Emigrantit në Angli i bllokohen 20 mijë paund në port, arrestohet
DURRES- Bllokohet në portin e Durrësit një sasi parash, ndërsa Policia vuri në pranga me akuzën e “Mosdeklarim të ardhurave në kufi” dhe “Pastrim të produkteve të veprës penale” poseduesin e tyre me iniciale D. B.. Sasia prej 20300 paund i është bllokuar nga Policia Kufitare një shtetasi nga Mati, pasi nuk i ka deklaruar ato kur ka hyrë në pikën kufitare. Kontrolli i imtësishëm i mjetit erdhi pas bashkëpunimit me Policinë italiane në Bari, pasi dyshohej se brenda saj ishin fshehur vlera monetare. Autoritetet shqiptare ishin infor- muar nga ato italiane se 40vjeçari nga Mati dyshohej se po kalonte në mënyrë të kundërligjshme një sasi të konsiderueshme në paund. Për këtë qëllim është mbajtur nën vëzhgim matjani për të mësuar se ku do të përfundonin këto para. Në momentin e zbulimit, ai është përpjekur të justifikohet me faktin se ato janë paratë e disa të afërmve të tij që jetojnë së bashku me të në Angli dhe ua kanë dërguar familjarëve të tyre që të ushqehen. Sa i përket faktit që nuk i kishte deklaruar në kufi, ai ka thënë se nuk ishte në dijeni të kësaj procedure. “Më datën 21.10.2018 është përzgjedhur për kontroll të imtësishëm shtetasi B. D., 40 vjeç, lindur në Mat dhe rezident prej 7 vitesh në Londër Angli, i cili kishte mbërritur në Durrës me tragetin e linjës Bari- Durrës. Nga kontrolli personal në prani të doganës, shtetasit B. D. iu gjetën 5300 paund si dhe gjatë kontrollit të imtësishëm të mjetit, Policia gjeti të fshehura në tavanin e mjetit dhe 3 pako me vlera monetare 15.000 paund britanikë”, thuhet në njoftimin e Policisë së Durrësit. Policia ngre dyshime se 40- vjeçari ka tentuar të pastrojë paratë e ndonjë organizate kriminale, ndaj edhe ka nisur hetimet për zbardhjen e kësaj ngjarje, duke kërkuar edhe nga partnerët e huaj informacione rreth aktivitetit të matjanit dhe të afërmve të tij në Angli. Policia Kufitare ka bërë bllokimin e sasisë prej 20,300 paund britanikë, ndërsa veprimet e mëtejshme po i kryen Drejtoria Vendore e Policisë Durrës për veprat penale “Mosdeklarim të ardhurave në kufi” dhe “Pastrim të produkteve të veprës penale”. Kjo nuk është hera e parë që bllokohen sasi parash në doganë, ndërsa poseduesit janë justifikuar se nuk ishin në dijeni se duhej t’i kishin deklaruar. l. m