Bojkoti gjatë çadrës, Topalli dhe Bode fitojnë rrogat
Vendimet kontradiktore të gjykatave, Patozi, Islami, Dogjani dhe Cara humbin betejën për të marrë rrogat
Njëmbëdhjetë deputetë të Partisë Demokratike që morën pjesë në dy bojkotet e opozitës në legjislaturën e shkuar kanë rifituar pagat e tyre.
Gazeta "Panorama" zbardh vendimet e 20 gjyqeve të zhvilluar nga deputetët dhe ish- deputetët e opozitës për periudhën e bojkotit, ku bie në sy se 11 deputetë kanë rifituar pagat e bojkotit të vitit 2014 dhe të 2017, ku u ngrit edhe çadra e opozitës në bulevardin "Dëshmorët e Kombit". Dy opozitarë të tjerë kanë fituar pjesërisht pagat e hequra, ndërsa 8 të tjerë nuk kanë mundur të bindin gjykatën.
FITUESIT Ndër ish- deputetët që kanë fituar pagat, të cilëve ish- kryetari i Kuvendit Ilir Meta ua mohoi ato, janë: Jozefina Topalli, Ridvan Bode, Arben Ristani si edhe deputetët Flamur Noka, Aldo Bumçi etj.. Ajo që bie në sy është padia e bërë nga Jozefina Topalli, e cila në vitin 2009 bëri të njëjtin vendim si Meta, duke u hequr pagat e ish- deputetëve të PS- së për periudhën që ata bojkotuan punimet e Kuvendit. Shuma e fituar në gjykatë përfshin pagat e deputetit për periudhën 01.07.2014 deri në datën 01.01.2015 dhe për peri- udhën nga data 01.02.2017 deri në datën 01.06.2017. Në vendimet e gjykatës kishte edhe dy fitues të pjesshëm. Deputetja Jorida Tabaku dhe ish- deputetja Mimoza Hajdarmataj nuk kanë arritur të bindin gjykatën për të fituar kompensimin e plotë të pagës. Tabaku ka fituar pagat për muajt janar, shkurt dhe prill të vitit 2017, ndërsa Hajdarmataj ka fituar pagat e muajve shkurt dhe prill të vitit 2017.
HUMBËSIT Gjykata Administrative e Tiranës ka vendosur që për 8 raste të mos u japë të drejtë opozitarëve. E veçantë është që të gjithë humbësit nuk kanë më mandatin e deputetit. Ndër emrat kryesorë janë Astrit Patozi, Igli Cara, Bedri Hoxha, Arbiloa Halimi, Kastriot Islami, Asllan Dogjani. Dy prej humbësve e kanë vuajtur mungesën e pagës në dy legjislaturat e shkuara. Konkretisht, Kastriot Islami dhe Asllan Dogjani, gjatë legjislaturës 2009- 2013 kanë qenë deputetë të Partisë Socialiste dhe më pas kaluan në krahun e djathtë, duke marrë edhe mandatin e deputetit nga Partia Demokratike përgjatë legjislaturës 2013- 2017. Si Islami ashtu edhe Dogjani kanë qenë pjesëtarë të bojkotit të ishopozitës socialiste në vitin 2009, ku ish- Kryetarja e Kuvendit në atë kohë, Jozefina Topalli, u hoqi të drejtën e pagës me argumentin e bojkotit.
BOJKOTET Paditë e bëra nga ish- deputetët dhe deputetët e Partisë Demokratike janë bërë për dy bojkotet e zhvilluara nga opozita në legjislaturën e shkuar. Bojkoti i parë i opozitës u bë në vitin 2014, pas konfliktit fizik ndërmjet ish- deputetit Arben Ndoka dhe deputetit të PD- së, Gent Strazimiri, që çoi deri në miratimin e ligjit të dekriminalizimit. Periudha e dytë e bojkotit përkon me atë që u pagëzua si "Çadra e opozitës", ku për rreth 4 muaj opozita bojkotoi punimet e Kuvendit, duke vendosur kushte për pjesëmarrjen e saj në zgjedhje. Ky bojkot përfundoi me arritjen e marrëveshjes Rama- Basha në 17 maj 2017.