Armë, tritol e drogë në banesë, arrestohet 51- vjeçari në Vlorë
VLORE- Policia e Vlorës organizoi dje një aksion blic të koduar "Maskimi", në një banesë në Vlorë dhe pasi zbuloi armë, tritol, granata e drogë të fshehura në të, arrestoi një 51vjeçar. Aksioni i Policisë u krye në bashkëpunim me Delta Forcë dhe FNSH- në paraditen e djeshme në lagjen "15 Tetori" të qytetit të Vlorës, zonë shumë pranë spitalit rajonal. Forcat e Policisë kanë ndërhyrë në banesën e shtetasit Gjergji Petani, pas informacioneve të siguruara në rrugë operative se në banesë kishte lëndë narkotike dhe armë. Pas një kontrolli të kryer në magazinën e katit të parë të banesës, Policia bëri të ditur se ka arritur të sekuestrojë një pistoletë të llojit "Zastava", katër kallëpe tritol, granatë ofensive si dhe cannabis sattiva. Pas kontrollit, Policia ka arrestuar në kushtet e flagrancës 51- vjeçarin Petani. Burime nga Policia e Vlorës kanë saktësuar se në momentin e aksionit gjatë ditës së djeshme është shoqëruar edhe një tjetër person, i cili më pas është lënë i lirë, pasi nuk u gjetën elementë dyshues që kishte lidhje me sendet e bllokuara. Mësohet se aksioni është përqendruar në banesën e Petanit, por kontrolle ka pasur edhe në banesa të tjera të dyshuara në zonën përreth, ku nuk janë gjendur lëndë narkotike apo armë.
"Në kuadër të operacionit u ushtrua kontroll në disa ambiente të dyshimta ku gjatë kontrollit të ushtruar në banesën e shtetasit Gjergji Petani, në lagjen ' 15 Tetori', Vlorë, konkretisht në magazinën në katin e parë të banesës, Policia gjeti dhe sekuestroi në cilësinë e provës materiale: Një pistoletë e llojit ' Zastava' me një krehër me fishekë, si dhe 161 fishekë të tjerë, 4 kallëpe tritol, si dhe pesë ndezëse detonatore për tritol, një granatë ofensive si dhe 47 fishekë 7.62 mm, mod 56, ( të montuara bashkë në formën e eksplozivit), si dhe rreth 2 kilogramë lëndë narkotike cannabis sativa. Shtetasi i arrestuar Gjergji Petani, akuzohet për veprat penale ' Prodhimi dhe shitja e narkotikëve', dhe ' Prodhimi dhe mbajtja pa leje e armëve luftarake dhe municionit', parashikuar nga nenet 283 e 278 të Kodit Penal", bëri të ditur Policia.