Formacioni, ja si pritet të kompozohet Kombëtarja
Ekipi ynë Kombëtar i futbollit i ka dhënë fund përgatitjeve disaditore në kuadër të dy ndeshjeve me Izraelin dhe Skocinë, që do luhen respektivisht sot në "Elbasan Arena" dhe pas tri ditësh në Skoci, që janë të vlefshme për turneun e Ligës së Kombeve. Edhe pse kishte disa ditë në dispozicion për të vendosur, italiani ka ende dilema në kokën e tij që pritet t'u japë zgjidhje vetëm pak orë para përballjes me izraelitët.
FORMACIONI Edhe në seancën e fundit përgatitore, shefi i pankinës kuqezi i "shkartisi disa herë letrat". Jo vetëm kaq, por bëhet me dije se formacioni zyrtar, do t'u bëhet me dije futbollistëve sot rreth orës 14: 00. Pra, balotazhi qëndron ende prezent për disa pozicione, sikurse janë: qendra e mbrojtjes me Mavraj- Veseli, si dhe e majta e prapavijës me Binakun më i avantazhuar sesa Agolli. Por duke analizuar situatën në të cilën ndodhet italiani, me rezultate të dobëta, pritet që të mos ketë eksperimente, por t'u besojë lojtarëve që kanë eksperiencën mbi supe. Në këto kushte pritet që Shqipëria të startojë me Strakoshën në portë, Mavraj- Gjimshiti në qendër të mbrojtjes të mbështetur në krahë nga Hysaj dhe i riu Binaku, i cili ka qenë deri në fund të ditës së djeshme në balotazh me kapitenin Agolli. Në mesfushë, ku edhe janë dilemat më të mëdha, Xhaka e Basha shihen ndër të sigurtët për fanellën e titullarit dhe më tej është Lilaj, që ka disi më shumë kuota sesa Lila dhe Memushaj. Për të udhëhequr manovrën sulmuese, sidomos me aksionet që do të nisin nga kundërsulme, Hyka pritet të startojë nga e majta dhe Gavazaj nga e djathta në mbështetje të Sindrit Gurit, që shihet me më tepër shanse për titullar në krahasim me Balajn.