Maskat i hyjnë me armë në shtëpi, pronari pas përleshjes: Rrezikova jetën
Përleshen me të zotin, plagoset kushëriri që e ndihmoi
Kam bërë rezistencë në maksimum dhe mund të kisha rrezikuar edhe jetën nga kjo ngjarje. ‘ Ku janë paratë’, pyesnin. Nuk ka para shtëpia, keni gabuar, ikni u thashë. Pasi hynë në derën kryesore të shtëpisë, e cila ishte gjysmë e hapur, tentuan që të hyjnë në dhomën ku ndodheshim të gjithë. Aty mbylla derën nga brenda, por ata e shkallmuan duke e nxjerrë nga menteshat
Katër persona me maska tentojnë të grabisin një familje në Porodinë të Korçës, dhunohet kushëriri i të zotit të shtëpisë.
Ngjarja ka ndodhur rreth orës 22: 30 të së dielës, në fshatin që ndodhet pak kilometra larg qytetit të Korçës. Ëngjëllush Dinkallari tregon se në momentin që katër autorët hynë në banesë, ai ka bërë rezistencë duke u përleshur me personat e maskuar dhe të armatosur, duke rrezikuar kështu që ngjarja të kthehej dhe në një tragjedi për të dhe familjen e tij.
“Sapo kishim hyrë në shtëpi rreth orës 22: 00 dhe po bëheshim gati për të fjetur. Në një moment, gruaja bërtet ‘ hajdutët’. Katër persona, të gjithë me armë dhe maska. Më goditën, më kërkuan telefonin dhe ua dhashë”, tregon 38vjeçari Dinkallari. Babai i dy fëmijëve bën apel për zbulimin e autorëve, pasi ndihet i pasigurt për familjen pas kësaj që ka ndodhur. “Kam frikë të qëndroj në banesën time. I kërkoj shtetit që të ndërhyjë, të bëjë diçka, të vendosë dorë! Të katër personat ishin të armatosur, me kallashnikov të katërt dhe me qytë të prerë, dytre herë e kanë mbushur armën në sytë e mi”, tregon kryefamiljari. Në momentin që autorët po tentonin të hynin me forcë në dhomën ku gjendeshin pjesëtarët e familjes, 38- vjeçari me gruan, dy fëmijët e mitur dhe nëna e tij kanë kërkuar ndihmë te fqinjët dhe kushërinjtë që kanë banesat pranë tyre. Kjo bëri që në pak minuta ata t’i shkonin në ndihmë familjes Dinkallari. Një prej kushërinjve të 38vjeçarit është dhunuar nga autorët duke përfunduar në spital. Kjo, pasi ai ka tentuar t’i heqë maskën njërit prej autorëve. Në momentin që ka ndodhur e gjitha kjo, në shtëpi ishin dhe dy fëmijët e mitur të Dinkallarit, të cilët janë të tronditur nga e gjitha ngjarja dhe dhuna e ushtruar. Nga përleshja me autorët e maskuar dhe të armatosur, këta të fundit kanë dëmtuar edhe orenditë dhe pajisjet elektroshtëpiake të familjes. Dyshohet se njëri prej autorëve është person i afërt, pasi njihte shumë mirë banesën dhe hyrje- daljen. “Kam bërë rezistencë në maksimum dhe mund të kisha rrezikuar edhe jetën nga kjo ngjarje. ‘ Ku janë paratë’, pyesnin. Nuk ka para shtëpia, keni gabuar, ikni u thashë. Pasi hynë në derën kryesore të shtëpisë, e cila ishte gjysmë e hapur, tentuan që të hyjnë në dhomën ku ndodheshim të gjithë. Aty mbylla derën nga brenda, por ata e shkallmuan duke e nxjerrë nga menteshat. Pastaj nisën të ushtrojnë dhunë, kanë dëmtuar orenditë e shtëpisë. Terror i paparë dhe siklet i madh”, shprehet 38- vjeçari, ndërkohë që bashkëshortja e tij ka deklaruar se ka arritur të identi- fikojë njërin prej autorëve që mund të sjellë zbardhjen e ngjarjes nga ana e Policisë. 38vjeçari Dinkallari deklaron se Policia ka mbërritur në banesën e tij rreth 30 minuta pas njoftimit, ndërsa deri tani nuk ka ende asnjë autor të arrestuar. “Më datë 12.08.2018, rreth orës 22.30, në fshatin Porodinë- Korçë, dyshohet se katër shtetas të maskuar, kanë hyrë forcërisht për të vjedhur në banesën e shtetasit E. D, 38 vjeç. Menjëherë, në vendngjarje kanë shkuar shërbimet e Policisë ku, sipas deklarimeve të pronarit të banesës, autorët dyshohet se kanë qenë të maskuar e armatosur dhe gjatë tentativës për të vjedhur, kanë lënduar lehtë njërin prej pjesëtarëve të familjes dhe më pas janë larguar duke mos arritur të realizojnë vjedhjen”, bëhet e ditur nga Policia, e cila ngriti pika të shumta kontrolli dhe krehu zonën me qëllim identifikimin dhe kapjen e autorëve.