REAGIMI I RUSISË: MOS LUANI ME TRONDITJEN E MARRËDHËNIEVE RUSO- AMERIKANE
Ambasada ruse në Tiranë ka reaguar të martën në lidhje me deklaratat për njohjen e pavarësisë së Kosovës nga Rusia. Qëndrimi i Rusisë është që çështjet për statusin e Kosovës duhet të zgjidhen në bazë të rezolutës 1244 të Këshillit të Sigurimit të OKB- së. Për më tepër, në reagim thuhet se nuk duhet të luhet me një tendencë të rrezikshme të tronditjes së marrëdhënieve ruso- amerikane. "U kushtuam vëmendje materialeve të zgjeruara të shfaqura në median ruse, bazuar në shkrimin e medias kosovare ' Gazeta Express', në të cilin, referuar "burimeve diplomatike", pohohet se gjatë samitit Rusi- SHBA të mbajtur në Helsinki më 16 korrik, Presidenti i SHBA- ve mbështeti propozimet gjoja të diskutuara, sipas të cilave Beogradi do të njohë pavarësinë e Kosovës, nëse territoret veriore ku jetojnë serbë etnikë do t'i bashkohen Serbisë. Me shumë përgjegjësi pohojmë se ky është një dezinformim absolut, ashtu si edhe spekulimet e tjera të shfaqura ditët e fundit në shtyp rreth disa ' marrëveshjeve të veçanta' të arritura në Helsinki.. Rusia mbështet në vazhdimësi procesin e negociatave, këmbëngul në realizimin e të gjitha marrëveshjeve të arritura në kuadrin e tyre dhe kurrë nuk do të përpiqet të diskutojë këtë çështje pas shpinës së palëve. I bëjmë thirrje komunitetit mediatik të përmbahet nga spekulimet flagrante për ekzistencën e marrëveshjeve të fshehta, të arritura midis Moskës dhe Uashingtonit. Nuk duhet luajtur me një tendencë tepër të rrezikshme të tronditjes së marrëdhënieve ruso- amerikane, nga gjendja e të cilave, në një masë të madhe, varet siguria ndërkombëtare, ashtu si edhe nuk duhen nxitur tensione në një rajon kaq të ndërlikuar siç është Ballkani".