Shifrat e abuzimit, KLSH: Në 6 muaj, 104 milionë euro dëm

“Abuzimet më të mëdha, në shitjen e pronës shtetërore dhe koncesionet. Dëme edhe me prokurimet e shpërblimet”

DËMI

104.4 milionë euro është dëmi i shkaktuar buxhetit të shtetit nga shkeljet dhe abuzimet e administratës, në auditin e kryer nga Kontrolli i Lartë i Shtetit për janarqershor 2018 30,8 milionë lekë është dëmi ekonomik nga shkeljet dhe parregullsitë në të ardhurat dhe në shpenzimet e kryera 73.6 milionë euro është dëmi, ku 22.1 milionë euro janë në fushën e të ardhurave dhe 51.5 milionë euro në fushën e shpenzimeve jo me eficiencë, efektivitet dhe ekonomicitet të fondeve

DORINA AZO Shkeljet dhe abuzimet e administratës për 6 muajt e parë të vitit 2018 i kanë shkaktuar buxhetit të shtetit dëm ekonomik në vlerën e 104 milionë eurove.

Shifrat me shkeljet u publikuan dje nga Kontrolli i Lartë i Shtetit, në buletinin e auditimeve për periudhën janar- qershor 2018. Gjatë kësaj periudhe, nga ana e KLSH- së janë bërë 26 kallëzime penale për drejtues kryesisht të rangut të mesëm dhe të lartë, në 26 institucione të administratës shtetërore.

DËMI Sipas Kontrollit të Lartë të Shtetit, për parregullsi dhe shkelje financiare në të ardhurat dhe në shpenzimet e kryera, dëmi ekonomik është me vlerë 3,868,623 mijë lekë apo 30.8 milionë euro. Kontrolli i Lartë i Shtetit ka konstatuar edhe shkelje të disiplinës financiare me ndikim negativ në performancën e subjekteve të audituara. Dëmi është 9,2 miliardë lekë, afërsisht 73.6 milionë euro, nga e cila: 2,7 miliardë lekë në fushën e të ardhurave, afërsisht 22.1 milionë euro, dhe 6,4 miliardë lekë, afërsisht 51.5 milionë euro, në fushën e shpenzimeve jo me eficiencë, efektivitet dhe ekonomicitet të fondeve. Sipas KLSH- së, për çdo një lekë të shpenzuar nga buxheti i shtetit për periudhën janar – qershor 2018, janë zbuluar nga auditimet e kryera në këtë 6- mujor 21,4 lekë.

SHKELJET Dëmi më i lartë është shkaktuar nga shkeljet në fushën e shitjes, blerjes dhe dhënies me qira të pasurisë shtetërore dhe koncesioneve me vlerë 2,113,750,000 lekë. Sipas Kontrollit të Lartë të Shtetit, ky dëm është shkaktuar nga 6 institucione. Më pas, sektori me dëm të lartë është ai i doganave dhe dëmi i shkaktuar nga shkeljet e abuzimet është në vlerën e 591,350,000 lekëve. Shkeljet më të mëdha janë konstatuar në doganën e Vlorës, Fierit dhe Rinasit. Në sektorin e Tatim – Taksave, dëmi i gjetur llogaritet në vlerën e përgjithshme prej 146,687,000 lekësh. Abuzime janë gjetur edhe me prokurimet dhe me pagat dhe shpërblimet. Në fushën e prokurimeve, shkeljet ishin në vlerën e përgjithshme prej 520,835 mijë lekësh, ku shkeljet më të mëdha ishin në Bashkitë Këlcyrë dhe Vlorë, me përkatësisht 37.4 dhe 29.3 milionë lekë. Në shkeljet me dëm ekonomik ( shpenzimet) në fushën e pagave, shpërblimeve dhe sigurimeve shoqërore, dëmi arrin në vlerën e përgjithshme prej 21,966,000 lekësh, ku pjesa më e madhe i përket Autoritetit të Aviacionit Civil Shqiptar, në vlerën 19,367,000 lekë.