Mediu: Qendër për luftëtarët e ISIS, cenon sigurinë kombëtare
Kreu republikan, Fatmir Mediu, e cilëson cenim të sigurisë kombëtare ngritjen e një qendre në Shqipëri, që do të strehojë luftëtarët e kthyer të ISIS. “Pjesëmarrja e Shqipërisë në luftën kundër terrorizmit si vend anëtar i NATO- s është domosdoshmëri dhe për më tej një nevojë e brendshme, duke konsideruar faktin se ka pasur rreth 140 Foreign Fighters të ISIS nga Shqipëria që kanë shkuar drejt Sirisë. Kjo tregon se ka pasur dhe ka një terren konkret të rekrutimit dhe veprimit të strukturave terroriste dhe lidhjeve të tyre në vend. Ndalimi para disa kohësh i aktit terrorist kundër ekipit kombëtar të Izraelit tregon qartë që strukturat terroriste janë aktive në Shqipëri dhe rajon. Financime për radikalizmin e fesë islame me lidhje terroriste kanë qenë prezente. Të gjitha këto të dhëna përbëjnë kërcënim serioz për sigurinë tonë kombëtare”, shkruan Mediu. Sipas tij, “Çdo ide për të ngritur një qendër në Shqipëri për rehabilitimin, grumbullimin e Foreign Fighters të ISIS të kthyer nga Siria apo qendër refugjatësh është një hap shumë i rrezikshëm i pamenduar dhe kërcënues për Shqipërinë dhe rajonin”. Mediu i kërkon Presidentit Meta të mbledhë Këshillin e Sigurisë Kombëtare. “Siguria kombëtare nuk është vetëm çështje e Edi Ramës apo qeverisë, ajo i takon Parlamentit dhe Këshillit të Sigurisë Kombëtare. Presidenti Meta duhet që urgjentisht të kërkoje të gjithë informacionin për këto lajme, qëndrime apo larg qoftë vendime të Ramës”, përfundon Mediu reagimin e tij.