Tritol në apartament biznesmenit 30- vjeçar, e ëma përfundon në spital nga tronditja
Lënda plasëse iu vendos para derës së shtëpisë. Terror në pallat, nëna e tij përfundon në spital nga tronditja e fortë
Një shpërthim i fuqishëm me lëndë plasëse tritol ndodhi në një pallat në lagjen "Lirim" të Vlorës, ndërsa shënjestër dyshohet se ishte një biznesmen.
Ngjarja që tronditi banorët dhe vetë familjen e shënjestruar ndodhi dje rreth orës 02: 30. Sipas të dhënave të Policisë, lënda eksplozive është vendosur në sheshpushimin e katit të pestë të pallatit, shumë pranë banesës së Fatjon Batës. Sipas Policisë, bazuar në hetimet e deritanishme dhe veprimet e kryera në vendin e ngjarjes, ka qenë pikërisht 30- vjeçari Bata shënjestër e sulmit me lëndë plasëse. Nga shpërthimi ka pasur vetëm dëme materiale, jo vetëm në apartamentin e objektivit të sulmit, por edhe te banesat e tjera të pallatit. Mësohet se 30- vjeçari Fatjon Bata jeton bashkë me nënën e tij, e cila pas shpërthimit është dërguar me urgjencë drejt spitalit rajonal të qytetit të Vlorës. Ajo është paraqitur në gjendje të rëndë jo për dëmtime të marra nga ngjarja, por për shkak të tronditjes së pësuar. Policia ka nisur hetimet menjëherë për aktivitetin e 30vjeçarit, i cili nuk rezulton person me precedentë penal apo problematik për Policinë, çka ka vështirësuar edhe hetimet për zbardhjen e plotë të ngjarjes. Mësohet se Bata disponon një subjekt tregtar në bulevardin Vlorë- Skelë, kryesisht me rroba. Sipas të dhënave, grupi hetimor aktualisht është përqendruar në dy pista, atë të ndonjë konflikti të të riut në ditët e fundit për shkaqe personale, si dhe për shkak të konkurrencës. Të dyja këto pista tashmë janë duke u hetuar, ndërsa në pyetje është marrë edhe 30vjeçari, i cili në momentin kur ka ndodhur ngjarja, ka qenë në banesë.
Burime të Policisë bënë të ditur se gjatë marrjes në pyetje, Bata është shprehur për hetimorët se nuk ka dijeni për autorët e mundshëm të kësaj ngjarje. Ai është shpre- hur se nuk ka konflikte me persona të tjerë, duke e përjashtuar këtë si pistë. Por pavarësisht dëshmisë së dhënë prej tij, Policia bëri të ditur se nuk përjashton konkurrencën dhe as atë të konflikteve si shkak i shpërthimit që tronditi të gjithë banorët e pallatit. Ata janë zgjuar të alarmuar, teksa në vend mbërriti në një kohë të shpejtë edhe Policia e Vlorës. Më e traumatizuar për ngjarjen ka qenë nëna e 30vjeçarit, e cila nuk e ka përballuar dot dhe përfundoi në spital. Sipas të dhënave të Policisë, në zonën ku ka ndodhur shpërthimi nuk ka pasur kamera sigurie që mund të çonin në identifikimin e autorit. Paraprakisht, blutë bënë të ditur se sasia e tritolit ka qenë rreth 200 gramë. Në pallat janë dëmtuar mure, dyer e xhama.
Policia nuk përjashton konkurrencën dhe as atë të konflikteve si shkak i shpërthimit që tronditi të gjithë banorët e pallatit. Ata janë zgjuar të alarmuar, teksa në vend mbërriti edhe Policia. Më e traumatizuar për ngjarjen ka qenë nëna e 30- vjeçarit, e cila nuk e ka përballuar dot dhe përfundoi në spital