Izolohen disa zona në Dibër dhe Kukës, qarkullimi me zinxhirë
DIBER - KUKES- Reshjet e borës kanë krijuar probleme në disa zona malore të Dibrës, Bulqizës e Matit. Mbi 700 metra mbi nivelin e detit trashësia e borës ka penguar lëvizjen normale të makinave. Rruga Peshkopi- Lurë mbrëmë rezultoi e bllokuar, duke penguar lëvizjen e mjeteve dhe banorëve. Probleme janë krijuar në njësitë administrative Kala e Dodës, Selishtë, Trebisht, Ostren, Xibër e Macukull. Sakaq, Policia Rrugore dje ka ngritur shumë postblloqe për kontrollin e mjeteve, që lëvizin në rrugët nacionale të Qarkut Dibër, duke u kërkuar drejtuesve të tyre të vendosin zinxhirë dhe të lëvizin me kujdes, pasi rreziku për aksidente është shtuar. Po ashtu firmat sipërmarrëse, që kanë marrë përsipër mirëmbajtjen e rrugëve, vijojnë të hedhin kripë e skorie në të gjitha rrugët e asfaltuara. Problemet më serioze janë krijuar dje në Bulqizë, pasi era e fortë dhe temperaturat e ftohta kanë krijuar pengesa të mëdha për lëvizjen normale të automjeteve. Ndërkaq, reshjet e dëborës kanë sjellë vështirësi në qarkullim edhe në autostradën e Kombit, ku qarkullimi kryhet vetëm me zinxhirë. Situata pritet të përkeqësohet, pasi reshjet kanë nisur pa ndërprerje. Edhe në Qarkun e Kukësit problematikat e motit dhe të dëborës kanë prekur më së shumti zonat e thella, ku disa fshatra janë thuajse të izoluara. Probleme me motin paraqiten edhe në disa zona të Librazhdit. Në mjaft akse nacionale në veri të vendit dhe juglindje, ekspertët e qarkullimit rekomandojnë lëvizjet vetëm nëpërmjet zinxhirëve. a. l.