Ftesa e Ramës për opozitën, Kryemadhi: Drejtësia nuk zgjidhet me tryeza politike
KED do verifikojë kandidatët për në Gjykatën Kushtetuese
Parlamenti ka përzgjedhur dje me short trupën prej 9 gjyqtarësh dhe prokurorësh që do të jenë pjesë e Këshillit të Emërimeve në Drejtësi.
Pjesë e KED- së, një prej organeve më të rëndësishme të sistemit të ri të drejtësisë, do të jenë dy anëtarët e Gjykatës Kushtetuese, Besnik Imeraj dhe Altina Xhoxhaj. Nga Gjykata e Lartë është përzgjedhur nga shorti me gogla Artan Broci, i cili do të ketë dhe postin e kryetarit të KED- së. Ndërkohë që nga radhët e Prokurorisë është përzgjedhur e vetmja kandidate që kishte propozuar Adriatik Llalla, ajo është prokurorja Rovena Gashi. Po ashtu, dje pa garë u emëruan dhe dy kandidatët e propozuar po nga Adriatik Llalla si anëtarë që vinin nga radhët e prokurorëve pranë gjykatave të apelit. Dy kandidatët që fituan pa hedhje shorti janë Gentian Trenova dhe Fatjona Memçaj. Enton Dhimitri dhe Fatos Qato janë anëtarët që dolën nga shorti i hedhur mes gjyqtarëve të gjykatave të apelit, ndërsa nga radhët e gjyqtarëve pranë gjykatave administrative u përzgjodh Ahmet Jangulli. Këshilli i Emërimeve në Drejtësi do të ketë Vitore Tushën nga Gjykata Kushtetuese, Shkëlzen Selimin nga Gjykata e Lartë, Sotiraq Lubonjën si anëtar i propozuar nga radhët e Këshillit të Lartë të Drejtësisë. Ndërkaq, nga radhët e Prokurorisë së Përgjithshme nuk ka asnjë kandidat zëvendësues, për shkak se asnjëri prej prokurorëve aktualë nuk i plotëson kriteret ligjore për të qenë pjesë e KED- së.
KED Këshilli i Emërimeve është organi i ri që u krijua nga Reforma kushtetuese në Drejtësi. Ky institucion ka detyrë kushtetuese të kryejë verifikimet e kushteve ligjore, si dhe të vlerësojë kriteret profesionale dhe morale të kandidatëve për inspektorë të lartë të drejtësisë. KED gjithashtu do të bëjë vlerësimin e të gjithë kandidatëve për anëtarë të Gjykatës Kushtetuese. KED ka mandat 1- vjeçar dhe çdo vit kalendarik bëhet shorti për zgjedhjen e anëtarëve të tjerë. “Këshilli i Emërimeve në Drejtësi kryen verifikimin e kushteve ligjore dhe vlerësimin e kritereve profesionale e morale të kandidatëve për inspektor të lartë të drejtësisë, si dhe të kandidatëve për anëtarë të Gjykatës Kushtetuese. Këshilli i Emërimeve në Drejtësi shqyrton dhe rendit kandidatët sipas meritës profesionale. Renditja e kandi- datëve nuk është e detyrueshme, me përjashtim të rastit kur nuk arrihet të emërohet kandidati”, thuhet në nenin 149 të Kushtetutës.