Vend pune si mësues, afati për regjistrimin në testim
DAR Tiranë: Kandidatët, kërkesë deri më 22 dhjetor
Edhe pse ende nuk është shpallur data e testimit, Ministria e Arsimit ka nxituar të urdhërojë Drejtoritë Arsimore, që të çelin procedurat për regjistrimin e kandidatëve të interesuar.
Me anë të një udhëzimi të posaçëm, DAR Tiranë ka njoftuar hapjen e aplikimeve deri më 22 dhjetor. Kështu, brenda tri javëve në vijim, të gjithë ata që janë të interesuar për një vend pune si mësues, mund të dorëzojnë dosjen pranë zyrave arsimore. Pjesëmarrja është e rëndësishme pasi vetëm duke qenë pjesë e sistemit, mund të të krijohet mundësia e punësimit. Të drejtën e garimit e kanë jo vetëm ata që nuk janë futur asnjëherë në testim, por edhe ata që i janë nënshtruar testimit në fazat e mëparshme. "Kandidatët, të cilët janë pjesë e listës përfundimtare të por- talit "Mësues për Shqipërinë 2016" dhe që dëshirojnë të përmirësojnë rezultatin e tyre në testim, duhet të paraqesin një kërkesë ku të përcaktojnë se dëshirojnë të rifuten në testim për të përmirësuar rezultatin me shkrim. Ndërko- hë, të gjitha ata që nuk dëshirojnë të përmirësojnë rezultatin, nuk duhet të paraqesin asnjë kërkesë apo dokumentacion shtesë pasi janë automatikisht pjesë e listës së portalit", thuhet në udhëzim. Në përfundim të këtij procesi bëhet renditja e kandidatëve, bazuar në pikët që ka arritur të sigurojë gjithsecili. Mbi bazën e këtij rankimi, bëhet edhe punësimi në sektorin e arsimit. Pavarësisht skepticizmit të shfaqur për funksionimin e këtij rregulli, Ministria e Arsimit vijon të këmbëngulë se të gjitha kontratat e reja kanë si referencë apo bëhen mbi bazën e renditjes së siguruar në portal. Sakaq, ende nuk ka një datë se kur do të zhvillohet testimi i njohurive. Drejtoria Arsimore e Tiranës ka njoftuar se shqyrtimi i çdo dosjeje do të bëhet deri më datë 4 janar të vitit të ardhshëm, atëherë kur do të shpallen edhe listat e kandidatëve të kualifikuar për të marrë pjesë në testim. Në tabelën përbri janë të listuara edhe dokumentet që duhet të dorëzohen nga të gjithë kandidatët.