Bashkim Shehu e Luljeta Lleshanaku, në garë për çmimin letrar “Balkanika”
Bashkim Shehu dhe Luljeta Lleshanaku përfaqësojnë letërsinë shqipe për çmimin “Balkanika” për vitet 2015 dhe 2016, që do të ndahen ditën e diel, më 3 dhjetor. Për edicionin e “Balkanika 2015”, juria kombëtare përzgjodhi romanin “Loja, shembja e qiellit” të shkrimtarit Bashkim Shehu. Për këtë roman, shkrimtari Bashkim Shehu është shpallur fitues i çmimit “At Zef Pllumi” në vitin 2013. Është hera e dytë që shkrimtari Bashkim Shehu përzgjidhet për të konkurruar në këtë garë letrare ndërballkanike. Në vitin 2007, ai u paraqit me romanin “Angelus novus” dhe arriti të ishte një nga tre të nominuarit e këtij çmimi. Romani “Loja, shembja e qiellit” është botuar në shqip nga shtëpia botuese “TOENA”, në vitin 2013. Ndërsa për edicionin e “Balkanika 2016”, juria kombëtare përzgjodhi vëllimin me poezi “Homo Antarcticus” të poetes Luljeta Lleshanaku. Vëllimi poetik “Homo Antarcticus” është botuar në shqip nga shtëpia botuese “OMBRA GVG”, në vitin 2015. Vëllimi poetik “Homo Antarcticus” i përkthyer në anglisht nga Ani Gji- ka si pjesë e vëllimit “Negative Space”, ka fituar garën për mundësinë e financimit të përkthimit dhe të botimit në SHBA, si dhe çmimin letrar “PEN Translates” - 2017 në Britaninë e Madhe dhe gjith- ashtu mundësinë e botimit në Britaninë e Madhe gjatë pranverës të vitit të ardhshëm.
Çmimi letrar “Balkanika” jepet nga fondacioni “Balkanika” me qendër ekzekutive në Sofje të Bullgarisë. Anëtarë të këtij fondacioni janë shtëpitë botuese: “Biblioteka 48” ( Bullgari), “Toena” ( Shqipëri), “Magor” ( FYROM), “Kedros” ( Greqi), “Laguna” ( Serbi), “Can” ( Turqi), “Muzeul National al Literaturi Romane” ( Rumani). Fituesit e edicionit të 17- të dhe të 18- të të këtij çmimi shpallen të dielën, nga juria ndërballkanike e këtij konkursi, në Qendrën Kulturore për të Rinj – Shkup. Më parë këtë çmim e kanë marrë shkrimtarët shqiptarë Fatos Kongoli ( 2002) dhe Ismail Kadare ( 2009).