Zoto në gjyq: Këtu jam për arsye tjetër, jo për tendera
Në autostradën Tiranë- Durrës, uji 75 cm bllokon drejtuesit. Vërshon edhe nëpër biznese e banesa
Shiu pa pushim gjatë gjithë ditës së djeshme ka sjellë problematikat e para që në orët e mesditës, duke e rënduar situatën në paradite e sidomos në darkë.
Situata u rëndua kur dhjetëra mjete u bllokuan në autostradën Tiranë- Durrës, si pasojë e bllokimit nga uji që arriti në gati 1 metër.
Policia e Shtetit, nëpërmjet një deklarate për shtypin, bëri apel për të gjithë drejtuesit e këtij aksi të kenë kujdes pasi niveli i ujit në pasditen e vonë arriti në 0.75 m. Është dashur ndërhyrja e Forcave të Armatosura. "Në autostradën Tiranë - Durrës, përballë karburant ' Kastratit', është bllokuar qarkullimi i mjeteve, pasi niveli i ujit në karrexhatë ka arritur mbi 0,75 metra. Policia Rrugore ka marrë masa, duke devijuar qarkullimin e mjeteve në rrugën dytësore përballë me karburantin. Policia Rrugore kërkon mirëkuptimin e drejtuesve të mjeteve dhe rritjen e kujdesit në rrugë gjatë drejtimit të automjetit. Të telefonojnë në numrin 112 dhe shërbimet e Policisë Rrugore dhe ato të Rendit do t'u vijnë në ndihmë menjëherë", thuhej në njoftimin e Policisë. Disa orë më pas, ujërat vërshuan edhe në bizneset e banesat përreth, duke shkaktuar dëme të konsiderueshme. Situata është rënduar edhe në zonën e Laknasit në Tiranë, si dhe në Kamzë, ku sipas të dhënave dh- jetëra persona janë evakuuar. Ndërkaq, në Shkodër Forcat e FNSH- së së qytetit dhe strukturat vendore të Policisë kanë ndërhyrë duke shpëtuar 2 persona, të cilët po rrezikoheshin nga dalja e lumit Kir në fshatin Bardhaj. Në ultësirën e Shkodrës reshjet po bëhen kërcënim për qindra banesa e biznese. Ndërkaq tre punonjës të OST- së janë plagosur gjatë një riparimi, ku sipas të dhënave dy prej tyre janë dërguar në gjendje të rëndë nga Shkodra në Tiranë. Si pasojë e motit të keq, një elektricist ndërroi jetë dje edhe në Fier. Ngjarja është regjistruar rreth orës 16: 15, në fshatin Kurjan, ku shtetasi S. V., rreth 50 vjeç, ka mbetur viktimë. 50- vjeçari me profesion elektricist, banues në fshatin Kurjan, ka qenë duke punuar në një shtyllë elektrike kur ka rënë në kontakt me korrentin. Ai kishte dalë në punë për shkak se nga moti i keq ishin shkëputur disa tela, duke lënë pa energji zonën. Era nuk e ka lejuar të punojë duke ia vështirësuar qëndrimin dhe punën lart në shtyllë e për pasojë ai ra në kontakt me energjinë, duke gjetur vdekjen e menjëhershme. Për 45minuta u bllokua nga vërshimi i uji edhe aksi nacional Gjirokastër- Kakavijë. Përroi u tejfry, duke dalë nga shtrati i tij i zakonshëm dhe vënë nën vete rrugën. Për rrjedhojë, me dhjetëra automjete që qarkullonin në të dyja anët e rrugës janë bllokuar derisa kanë ndërhyrë fadromat e Ndërmarrjes Rajonale të Rrugëve për të sistemuar inertet që sillte përroi. Probleme me ujin dhe energjinë ka edhe në Memaliaj, si dhe disa zona të thella të Gjirokastrës, përfshirë këtu edhe bllokime si pasojë e rrëshqitjes së dherave.