Tre ish- drejtorë Policie në arrest për dosjen “Habilaj”, deputetja e PS thirret në Prokurori
URDHERARRESTE PER ISH- DREJTORIN E POLICISE SE VLORES, SHEFIN E KRIMIT TE ORGANIZUAR DHE ATE TE DHERMIUT
Prokuroria e Krimeve të Rënda ka firmosur urdhërarrestet për 3 ish- drejtues të Policisë së Vlorës, pasi dyshohet se janë të përfshirë në çështjen “Habilaj”, për të cilën është nën hetim edhe Saimir Tahiri.
Burime nga organi i akuzës thanë dje se është kërkuar arrestimi i ish- drejtorit të Policisë së Vlorës, Jaeld Çela, ish- shefit të Postës së Dhërmi, Sokol Bode dhe ish- shefit të Krimit të Organizuar të Vlorës, Gjergji Kohila. Të njëjtat burime thanë se për njërin nga ish- drejtuesit është marrë masë sigurimi “arrest me burg”, në mungesë nga Gjykata e Krimeve të Rënda, paraditen e djeshme. Ndërsa për dy të tjerët janë lëshuar urdhra ndalimi nga Prokuroria. Nga ana tjetër, mësohet se në lidhje me të njëjtën çështje është thirrur për t’u marrë në pyetje në Prokurori edhe deputetja e Partisë Socialiste, Elona Gjebrea. Burimet thanë se Gjebrea është thirrur në cilësinë e ish- ministres së Brendshme, në kohën që në krye të këtij dikasteri ishte Saimir Tahiri, tashmë person nën hetim. Deri në orët e vona të mbrëmjes së djeshme Policia nuk i ka ekzekutuar urdhërarrestet, për arsye që ende nuk dihen. Megjithatë, burimet thanë se njëri nga ish- drej- tuesit e lartë nuk ndodhet në Shqipëri.
HETIMI
Gjatë hetimeve të dosjes “Habilaj” tre ish- zyrtarët e lartë të Policisë dyshohet se me mosveprimet e tyre kanë lejuar vëllezërit Habilaj të kultivojnë kanabis sativa. Ndërsa ka dyshime edhe për favorizimin e tyre në trafikimin e sasive të konsiderueshme të drogës në drejtim të Italisë. Për një prej këtyre drejtuesve, Sokol Boden, ish- shefi i Postës në Dhërmi dhe ish- shef i Kufirit në Drejtorinë e Vlorës, për të cilin opozita ka publikuar edhe fotografi të tij me vëllezërit Habilaj, Gjykata e Krimeve të Rënda ka dhënë masën e sigurisë se “arrestit me burg”. Ndërsa për Jaeld Çelën, ish- drejtori i Policisë së Qarkut të Vlorës dhe Gjergj Kohilën, ish- shefi i Sektorit të Luftës Kundër Krimit të Organizuar, në të njëjtën drejtori vendore, janë nxjerrë urdhra ndalimi. Burime nga Prokuroria thanë se akuza që rëndon mbi këta ish- zyrtarë nga Policia është ajo e mosveprimit ndaj kultivimit të kanabisit në Qarkun e Vlorës. Të tre ishdrejtuesit e Policisë së Vlorës kanë shërbyer atje gjatë viteve 2014 – 2016. Ende nuk ka një konfirmim zyrtar për arrestimin e tyre nga Policia.
VERIFIKIMET
Të tre ish- drejtuesit e Policisë, për të cilët tashmë Prokuroria ka lëshuar urdhrat e arrestimit, janë transferuar nga detyra në fund të muajit prill të këtij viti, kur në krye të Ministrisë së Brendshme u emërua ministri aktual, Fatmir Xhafaj. Njëri prej tyre, Sokol Bode, ndaj të cilit ka dhe një masë sigurimi “arrest me burg”, lëshuar paraditen e djeshme nga Gjykata e Krimeve të Rënda, ishte transferuar në Shkodër që në fillim të muajit prill.