Vijon sherri në Ministrinë e Arsimit, Karabina ankohet te Bordi i UT
Ministrja e Arsimit, Mirela Karabina, ka vendosur ta çojë deri në fund "inatin" me sekretarin e përgjithshëm, Plarent Ndreca. Në rolin e titullares, ajo i kërkon Universitetit të Tiranës të mos njohë asnjë lloj shkrese të nënshkruar prej tij. Kërkesa është bërë një ditë më parë me anë të një e- maili drejtuar rektorit, anëtarëve të bordit dhe të Senatit të Universitetit të Tiranës, nëpërmjet asistentes së ministres. Aty citohet se "teknikja" e Arsimit është vënë në dijeni për korrespondencën e autoriteteve me sekretarin Ndreca, që sipas saj, përbën "shqetësim konstant". "Nga rektorati i UT- së, ministrja është njohur me një korrespondencë të Ministrisë së Arsimit dhe Sportit me këtë institucion të rëndësishëm për të cilën ka qenë e painformuar". Nisur nga kjo, Karabina u rikujton se ka një urdhër pezullimi për të, e rrjedhimisht asnjë akt administrativ i nënshkruar prej tij nuk njihet. "Si titullare e Ministrisë së Arsimit, si zbatues të ligjit, në funksion të mbarëvajtjes së punës në institucionet tona arsimore, informacioni i përcjellë do të shërbejë për ligjshmërinë e punës suaj. Detyrimi ynë institucional është t'ju informojmë së për z. Plarent Ndrecën ka një urdhër të ministrit të MAS, nr. 349, prot, datë 29.06.2017, "Për vlefshmërinë e akteve, shkresave në MAS, si dhe vlefshmërinë e shkresave në institucionet e varësisë", si dhe urdhrin nr. 345, prot., datë 20.06.2017, "Për disa ndryshime dhe shtesa në Rregulloren e Brendshme të Ministrisë së Arsimit dhe Sportit, nr. 2457 prot., datë 09.03.2017". Për sa më sipër, z. Ndrecat i është hequr e drejta e nënshkrimit të akteve administrative". Përplasja midis numrit një të Arsimit dhe nëpunësit më të lartë ka nisur që në muajin qershor dhe është pasuar me disa kallëzime dhe procedime penale në Prokurori.