Demaliaj: Po më shantazhojnë, do njoftoj Ambasadën Amerikane për këto shkelje ligji

Ish- studenti i dhjetorit, Ilir Demaliaj ka reaguar ashpër ndaj publicistit Loloçi, i cili i ka publikuar një dosje të të atit, duke e akuzuar se ka qenë i Sigurimit të Shtetit.

Përmes një postimi në "Facebook", Demaliaj akuzon Kastriot Dervishin dhe Loloçin se kanë shkelur ligjin. Ai thotë se ka njoftuar Ambasadën Gjermane dhe atë Amerikane për këtë çështje.

"Sot Loloçi nxori kartelën e sigurimit. Ja dhe shantazhimi dhe delegjitimimi që duan të më mbyllin gojën me anë të biografisë së prindërve!!! Kush e bëjnë dhe nga kush mbrohet Kadareja! Cerçiz Loloci, ka qenë sekretar i dytë i Komitetit te Rinisë së Tiranës nga viti 1985 deri në vitin 1990, ku sekretar të parë kishte Fatmir Xhafën. Nuk është e nevojshme të sqaroj se çfarë funksionesh dhe detyrash kishin sekretaret e rinisë dhe sa të besuar të partisë ishin dhe çfarë biografie kishin me lidhjet me regjimin. Unë, i biri i sigurimit të shtetit, nuk kam qenë asnjë ditë në jetën time në asnjë organizate rinie, partie, bashkimesh profesionale, në asnjë lloj grupimi dhe bashkëpunimi në jetën time me regjimin e kaluar dhe vazhdimësinë e regjimit që mbrojnë shërbëtorët e regjimit dje dhe sot, dhe me asnjë grupim në ketë rruzull, përveç se me lirinë time. Lirinë time e kam të shenjtë dhe nuk mund të ma blejnë as lolocët as dervishët, as kushdo tjetër në mbrojtje të padronëve të tyre si shërbëtore të demagogëve propagandistike të regjimit komunist. Ja pra kush me gjykon mua. Po postoj dosjen e nxjerrë sot nga Dervishët dhe Loloçët me fotografinë e marrë nga kartela e punës së tim ati nga arkiva e Ministrisë Brendshme, që është e fotokopjuar dhe mbahet në shtëpinë e Kastriot Dervishit për të delegjimituar dhe më shantazhuar mua", shkruan ai në FB. "Nuk ndodh në asnjë vend të botës që një ish- drejtor arkivash të marrë arkivën në shtëpi duke e kthyer në pronë të tij, për shantazhim, deligjimitim të njerëzve të lirë, për t'u shërbyer strukturave kriminale të politikës, medias, dhe oligarkisë kriminale që po varros vendin dhe po detyron shqiptarët të largohen nga sytë këmbët. Ky është vetëm fillimi. Do te njoftoj Ambasadën Amerikane dhe atë Gjermane, për këto akte kriminale në shkelje të të drejtave të individit nëpërmjet shantazhit njësoj si sigurimi i shtetit dje me strukturat në vazhdim sot", vijon ai.