Beqaj në Korçë: 1.36 mld lekë për maternitetin

Ambiente tërësisht të rikonstruktuara, bashkë me një shtesë në Maternitetin e Korçës është projekti i radhës për Ministrinë e Shëndetësisë, me një vlerë prej 1 miliard e 360 milionë lekësh. Zv. kryeministri Niko Peleshi, bashkë me ministrin e Shëndetësisë, Ilir Beqaj, ishin aty për të parë projektin që pritet të nisë punimet në muajin prill. “Janë 1 miliard e 360 milionë lekë të vëna në dispozicion nga buxheti i shtetit për fillimin e rikonstruksionit dhe të shtesës për Maternitetin e Korçës. Procedurat e prokurimit kanë filluar. Këshilli Kombëtar i Territorit ia ka deleguar Bashkisë së Korçës procedurat për dhënien e lejes së ndërtimit, kështu që ne besojmë që brenda muajit prill do të fillojmë punimet, të cilat do të zgjasin rreth 12 deri në 14 muaj”. Ndërsa për zv. kryeministrin, ky projekt është një investim me rëndësi për të gjithë qarkun, ndërsa i parapriu lajmit për financimin dhe për blerjen e pajisjeve. “Unë e përgëzoj dhe e falënderoj ministrin që e ka futur në paketën e projekteve prioritare për vitin në vazhdim, është një procedurë e filluar, rindërtimi apo ndërtimi i një materniteti të ri këtu te kjo godinë, gjysmë e rrënuar, që kemi mbrapa. Është një investim i qenësishëm prej 1 miliard e 360 milionë lekësh, siç e tha ministri, pastaj do të ketë pothuajse po kaq edhe për blerjen e të gjitha pajisjeve moderne të këtij materniteti”, theksoi numri dy i Qeverisë. Dy zyrtarët e lartë inspektuan edhe ecurinë e punimeve për ndërtimin e qendrës së re të shërbimit të hemodializës, e cila do të jetë gati pas dy muajsh.