Prokuroria: 10 emrat që përdori Armando Prenga
“Deputeti fshehu dënimin për katër krime në Itali”
TRAZHGIM SOKOLAJ Deputeti socialist Armando Prenga ka përdorur dhjetë emra gjatë qëndrimit në emigracion në Itali.
Ky fakt konfirmohet nga dokumentet që ndodhen në dosjen e administruar tashmë në zyrën përkatëse të Prokurorisë së Përgjithshme për hetimin e rasteve të dekriminalizimit. Sipas burimeve nga organi i akuzës, prokuroria ka kërkuar heqjen e mandatit për deputetin e PS-së, Armando Prenga, për shkak të dosjes me materiale hetimore të ardhur nga Italia. Në këtë dosje jepen me detaje identitetet që ka pasur Armando Prenga. “Në ngarkim të shtetasit Mondi Prenga, me datëlindje 26 qershor 1974, rëndojnë precedentë penalë, falsifikim dokumentesh dhe krime kundër pronës”, thuhet ndër të tjera në dokumentet e sjella në Tiranë nga pala italiane. Sipas shkresës në gjuhën italiane, i njëjti person aktualisht nuk rezulton subjekt në kërkim nga autoritetet italiane. “Shtetasi Prenga Mondi, lindur më 26 qershor 1974, i skeduar nga Kuestura e Milanos më datë 21 gusht 1996, rezulton i regjistruar me të dhëna dhe foto edhe me gjeneralitetet: Ardian Ndoka, Mond Gjoni, Gjoni Don, Arjan Ndoci, Arjan Ndoc, Arjan Noci, Mondi Prenga”, thuhet në dokumentin e mbërritur në Shqipëri nga drejtësia italiane. Burimet nga hetimi kanë thënë se pas nisjes së verifikimeve në lidhje me Armando Prengën ka pasur të dhëna për precedentë penalë të tij në Itali. Për këtë arsye, autoriteteve italiane fillimisht u janë nisur të dhënat e identitetit dhe u është kërkuar nëse personi ka përdorur emra e gjeneralitete të tjera në shtetin italian. Më pas, prokuroria ka pyetur palën italiane nëse emrat e përdorur nga deputeti rezultonin me dënime dhe përgjigjja ka qenë pozitive. Pasi ka renditur identitetet e përdorura nga Armando Prenga, pala italiane ka theksuar se ai ishte i dënuar për vjedhje pasurish, falsifikime në përgjithësi, marrje të pasurisë së vjedhur, deklarata për identitet të rremë në vitet 1996- 1997 në qytetin e Milanos. Të gjitha këto të dhëna, sipas Prokurorisë, nuk janë deklaruar në formular sipas detyrimit ligjor nga deputeti. KËRKESA PËR KQZ- NË
Më 16 shkurt, Prokuroria e Përgjithshme i kërkoi Komisionit Qendror të Zgjedhjeve heqjen e mandatit për Armando Prengën. Në një deklaratë, prokuroria tha se ka konkluduar se një deputet i Kuvendit të Shqipërisë është në kushtet e ndalimit të ushtrimit të funksionit, në bazë të ligjit “Për verifikimin e integritetit të personave që zgjidhen, emërohen ose ushtrojnë funksione publike”, ose i njohur ndryshe si ligji për dekriminalizimin. “Sektori i Dekriminalizimit në Prokurorinë e Përgjithshme ka konstatuar se subjektit Armando Prenga i duhet ndërprerë mandati i deputetit”, deklaroi Prokuroria e Përgjithshme. Sipas saj, Prenga rezulton se nuk ka deklaruar një dënim të formës së prerë dhënë nga Gjykata e Rrethit Gjyqësor Kurbin për veprën penale të “falsifikimit të dokumenteve”, me 450 000 lekë gjobë. Po ashtu, sipas Prokurorisë, Armando Prenga nuk ka deklaruar as faktin që rezulton me precedentë penalë në shtetin italian për vjedhje pasurish, falsifikime në përgjithësi, marrje të pasurisë së vjedhur dhe deklarata për identitet të rremë në vitet 1996- 1997 në qytetin e Milanos. “Këto të dhëna janë konfirmuar nga komunikimi zyrtar me autoritetet italiane”, kanë bërë me dije burimet e Prokurorisë së Përgjithshme.