Zunë plazhet në Velipojë, Bashkia i çon në Prokurori
Ademi: Zaptuesit e hapësirave nuk i largonim dot me gjoba
Task Forca e ngritur për lirimin e hapësirave publike në plazhin e Velipojës ka dështuar.
Një gjë të tillë e thotë kryetarja e Bashkisë Shkodër, Voltana Ademi. Kryebashkiakja është detyruar që të kallëzojë penalisht në Prokurorinë e Shkodrës ata persona, të cilët kanë zënë me shezlongë hapësirat publike të përcaktuara nga Bashkia për pushuesit. Task Forca përbëhet nga Policia, Prokuroria, Tatimet, Krimi ekonomik, Hetimi tatimor dhe vetë Bashkia Shkodër, por sipas kryebashkiakes, ajo nuk ka arritur që të funksionojë siç duhet dhe të bëjë të mundur lirimin e hapësirave publike në Velipojë. "Një ndër problematikat më të mëdha është zënia e hapësirave publike. Është krijuar Task Forca bashkë me Policinë, Tatimet, Krimin ekonomik, Hetimin tatimor dhe Prokurorinë, por me keqardhje them se nuk kemi pasur asnjë veprim të mëtejshëm për detyrimet ligjore që kanë këto institucione për të vepruar. Bëhet fjalë për ato biznese që ushtrojnë aktivitetin e tyre të paligjshëm në bregun e detit", deklaroi kryetarja e Bashkisë së Shkodrës, nën varësinë e së cilës edhe dhe njësia administrative e Velipojës. Sipas saj, në vijim do t'u dërgohet sërish Tatimeve një shkresë, ku nominalisht do t'u bëhet e ditur për aksionin e ditëve të fundit për lirimin e hapësirave publike. "Bashkia Shkodër ka bërë një kallëzim penal gjithashtu në Prokurori, duke e denoncuar këtë fakt dhe duke kërkuar që ligji të zbatohet. Flasim për biznese që nuk janë licencuar dhe ushtrojnë aktivitete të kundër- ligjshme, duke zënë hapësirat publike. Kjo cenon të drejtat e njeriut, por edhe tregun dhe ato biznese që paguajnë taksat. Janë 51% e plazhit që ne kemi paracaktuar që të ishte e lirë për pushuesit", shprehet Ademi.
Kryebashkiakja e Shkodrës ia faturon më shumë dësh- timin e Task Forcës së Drejtorisë Rajonale të Tatimeve. "Ka persona konkretë që janë kallëzuar penalisht nga Bashkia Shkodër, por janë edhe të verifikuar nga Krimi ekonomik. Drejtoria e Tatimeve ka detyrime ndaj këtyre bizneseve të paligjshme dhe jo t'i licencojë, sepse nuk bëhet fjalë për licencime, por t'i sekuestrojë shezlongët, sepse Bashkia Shkodër nuk e ka këtë mundësi të bëjë sekuestrime. Gjoba më e madhe që mund të vendosim në bazë të ligjit nuk mund të jetë më shumë se 20 mijë lekë të rinj, shumë e cila nuk pengon zënien e hapësirave publike në plazhin e Velipojës", tha Ademi. Ajo theksoi se: "Mbi 7 herë jemi përpjekur që me punëtorët tanë të Bashkisë t'i heqim shezlongët, por sërish janë vendosur. Kështu nuk jam aspak e kënaqur me bashkëpunimin me institucionet që përbëjnë Task Forcën dhe këtë e them me keqardhje".