Basha: Nga PD nuk ka pasur asnjë kusht të ri
Para hapjes së seancës në Kuvend për votimin e Reformës në Drejtësi, kryetari i Partisë Demokratike, Lulzim Basha, doli në një deklaratë për mediat duke bërë të ditur qëndrimin e partisë që ai drejton. Basha theksoi se nuk ka pasur asnjë kusht të ri nga PD- ja. “Xhafaj pranoi se drafti zyrtar i PS- së nuk përfshin as rekomandimet e Nuland, as rekomandimet e Hahn. PD- ja kurrë nuk e ka pranuar këtë draft, as nuk e ka parë. Pjesa e KLGJ- KLP është pjesa e vetme që ne kemi cilësuar si pjesa e votës së trafikueshme”, tha kreu i PD- së. Sipas tij, marrëveshja u përshëndet nga zyrtarë të lartë europianë. “Pse do ta bënim diçka të tillë? Pse do t’ia anonçonim marrëveshjen Kancelares Angela Merkel, ndihmëssekretares Victoria Nuland, komisionerit për Zgjerimin, Johannes Hahn, kryetarit të Partive Popullore, Joseph Daul, kryetarit të Komisionit të Marrëdhënieve me Jashtë të Parlamentit Europian, Elmar Brok, kryetarit të Presidencës së Bashkimit Europian, Lajcak, në telefon gjatë gjithë ditës? Pse do ta bënim këtë dhe pastaj të riktheheshim në tavolinë për të ribërë marrëveshjen? Pse, a mund ta thotë dikush? Ky është një mashtrim i pacipë”, tha Basha. Ai theksoi se për Reformën në Drejtësi ka një marrëveshje dhe bëri thirrje për ta votuar atë sot në Parlament. “Ne kemi një marrëveshje dhe jemi gati ta miratojmë sot në Kuvend. Mbi tavolinë ka një marrëveshje dhe Edi Rama duhet ta miratojë atë. PD- ja do të jetë në Parlament për të miratuar këtë marrëveshje”, shtoi Basha.