Vasili publikon fakte për kapjen e drejtësisë: Askush s’mashtrohet nga drejtësia me regji
Nënkryetari i LSI-së, Petrit Vasili renditi dje disa fakte për kapjen e drejtësisë në vend, për kundër publicitetit të madh propagandistik lidhur me reformën në drejtësi dhe pritshmëritë e larta të saj; për një drejtësi të re, të pavarur dhe efikase. Përmes një shënimi në rrjetin social ‘Facebook’, Vasili theksoi se faktet flasin vetë; kur në vend të çuarjes përpara drejtësisë të përgjegjësve të qeverisë për korrupsionin gjigant tek Astiri dhe korrupsioni shkoi deri në Delaware të SHBA, drejtësia me regji hapi çështje të konsumuara të 20 viteve përpara vetëm për të devijuar vëmendjen, ndaj edhe zhgënjimi ishte shumë i madh. “Të gjithë prisnin hetimin e kryeministrit, që shantazhoi punonjësin e policisë Emiljano Nuhu që denoncoi të vërtetat dhe u detyrua të largohet nga vendi, por drejtësia me regji heshti. Të gjithë prisnin hetimin dhe dënimin e krerëve të policisë që manipuluan provat dhe mashtruan opinionin për vrasjen e Klodian Rashës, por drejtësia me regji prap heshti dhe mbylli gjithçka. Të gjithë prisnin të hetoheshin, policia dhe ministria e brendshme për arrestimet dhe dhunën e banditëve civile të pa identifikuar gjatë protestës për shembjen e Teatrit. Të gjithë prisnin të hetohej krimi shtetëror monstruoz për shembjen e Teatrit, por sërish asgjë s’ndodhi. Fakti më i madh mbetet që Drejtësia me regji në vend që t’u kthejë përgjigje këtyre çështjeve tronditëse, përkundrazi inskenon veprime pa vlerë ndaj personave të mbaruar vetëm e vetëm që të realizojë devijimin propagandistik të vëmendjes. Reforma në drejtësi kishte qëllim ndërtimin e institucioneve të pavarura, që do të godisnin shumë fort, shumë shpejt, pa asnjë kompromis dhe të pandikuar nga asnjë faktor vendas dhe i huaj. Realiteti flet qartë për një drejtësi të kapur dhe që funksionon me regji si zgjatim i qeverisë së rilindjes dhe kryeministrit të saj”, - tha Vasili.