Kreu i SPAK paralajmëron goditje të tjera: Arrestimet, vetëm fillimi
“Vijojmë hetimin e zyrtarëve të lartë”, Kraja: Nxjerrja para drejtësisë e fajtorëve “Dërguam për gjykim një grup të rrezikshëm kriminal”
Kreu i SPAK, Arben Kraja, në një tryezë për 5-vjetorin e reformës në drejtësi paralajmëroi dje goditje të tjera në rang të zyrtarëve të lartë. Kraja u shpreh se prioritet i SPAK është goditja e krimit dhe e atyre që abuzojnë me fonde publike. I pranishëm në konferencën ‘Forcimi i drejtësisë penale’, kreu i SPAK, foli mbi punën e institucionit që ai drejton si edhe për prioritetet e së ardhmes. Kraja tha se BKH është, gjithashtu, drejt konsolidimit, ndërsa kërkoi nga Ministria e Drejtësisë, të mendohet një hapësirë e re për akomodimin, për të pasur hapësirën e duhur. “Kemi qenë dhe në Gjykatën Kushtetuese ku kemi mbajtur qëndrimin tonë për ligjin për përgjimet e Policisë së Shtetit. Ai ligj duhet të ribëhet edhe njëherë. Kemi zbatuar në aspektin formal dhe raportin me institucionet e tjera. Prioriteti ynë duhet të jetë lufta kundër korrupsionit dhe hetime për zyrtarët e lartë. Ato që kanë ndodhur në ditët e fundit nuk janë fundi i punës, por vetëm fillimi dhe do të vijojmë me të njëjtin ritëm dhe të njëjtën përparësi. Lufta kundër korrupsionit, kundër krimit të organizuar dhe kundër abuzimit me fonde publike janë prioritet i luftës sonë”, - theksoi kreu i SPAK. Duke iu referuar arrestimit të kreut të Bashkisë së Lushnjës, Fatos Tushe, Kraja tha se ky nuk është rasti i fundit por vetëm fillimi i luftës kundër atyre që kanë shkelur ligjin. “Lufta ndaj krimit të organizuar, korrupsionit ndaj zyrtarëve të lartë është sfida kryesore.
PARALAJMËRIMI
“Lufta ndaj krimit të organizuar dhe korrupsionit mbeten prioritet. Dy-tri ngjarje janë bërë publike ditët e fundit, nuk është fundi, por është fillimi i një produkti të punës sonë në të ardhmen. Lufta kundër krimit, pastrimit të parave janë ndër prioritetet tona. Puna jonë mbaron kur kemi një vendim të formës së prerë të gjykatës, jo me masa sigurimi”, - tha z.Kraja.
Ngjarjet e fundit është fillimi i një produkti për të cilën ne ka kohë që ka vijuar dhe do të vijojnë deri në fund. Lufta ndaj pastrimit të parave, korrupsionit dhe shkelësve të ligjit do të vijojë deri në nxjerrjen para drejtësisë të fajtorëve. Dy-tri ngjarje janë bërë publike ditët e fundit, nuk është fundi, por është fillimi i një produkti të punës sonë në të ardhme. Dërguam për gjykim një grup të rrezikshëm kriminal. Në të ardhmen kemi shumë punë për të bërë, është vullneti, prokurorët kanë pavarësinë e duhur për të vendosur bazuar në prova, kanë mbështetjen e duhur. Bashkëpunimi do të vijojë me të gjitha strukturat”, - tha Kraja. Për shkak të ndjeshmërisë së dosjeve që prokurorët e SPAK-ut kanë në duar, Kraja theksoi nevojën e plotësimit të strukturës që ai drejton
me 20 prokurorë nga 13 që ka aktualisht. Të martën me urdhër të SPAK-ut në pranga sa edhe kryebashkiaku i Lushnjës Fatos Tushe, së bashku me zyrtarë të tjerë të bashkisë e biznesmenë, të akuzuar për abuzime me tenderët. Ndërsa megaoperacioni “Shpirti” çoi në arrestimin e 38 personave, ku mes të ndaluarve kishte edhe prokurorë e zyrtarë të policisë.
REFORMA
Kreu i Këshillit të Lartë të Prokurorisë, Gent Ibrahimi ishte dje i pranishëm në konferencën me temë “Forcimi i drejtësisë penale nëpërmjet bashkëpunimit të ngushtë të institucioneve të drejtësisë” në kuadër të përvjetorit të pestë të Reformës në Drejtësi. Ibrahimi deklaroi se “Reforma në drejtësi e rithemeloi sistemin e drejtësisë bazuar, midis të tjerash, në
parimin e depolitizimit dhe të vetëqeverisjes së pjesshme të sistemit”. Ai kujtoi se “vetëm 5 vite më parë, Ministria e Drejtësisë ishte administratori ekskluziv i gjykatave në këtë vend”. “Ministria e Drejtësisë ishte inspektor i gjykatave dhe gjyqtarëve dhe, gjithashtu, iniciuesi ekskluziv i procesit disiplinor ndaj gjyqtarëve. Pa firmën e ministrit asnjë gjyqtar nuk mund t’i nënshtrohej procedimit disiplinor. Në gjysmën tjetër të sistemit të drejtësisë, kompetencat qeverisëse ishin grumbulluar në duart e një njeriu të vetëm që ishte Prokurori i Përgjithshëm, që nuk ishte veçse një guvernator fuqiplotë i politikës në sistemin e prokurorisë. Ai zgjidhej dhe shkarkohej me shumicë të thjeshtë nga parlamenti, shërbente pa afat kushtetues dhe në kushtet e mungesës së plotë të llogaridhënies”,theksoi z.Ibrahimi.