Konflikti në Universitetin e Tiranës, Shahini firmos urdhrin për shtyrjen e zgjedhjeve
Studentët e Drejtësisë padisin ministren e Arsimit
Nisja e regjistrimit të kandidaturave për organet drejtuese në Universitetin e Tiranës ka sjellë mjaft polemika e debate ditët e fundit. Ministrja e Arsimit, Sportit dhe Rinisë, Besa Shahini, ka firmosur dje urdhrin për shtyrjen e datës së zgjedhjeve për institucionet e arsimit të lartë, por ka theksuar se procesi përgatitor për këto zgjedhje do të vazhdojë. "Data e zgjedhjeve për organet drejtuese të IAL- ve shtyhet deri në një moment të dytë, kur mund të sigurohet pjesëmarrje më gjithëpërfshirëse e studentëve. Procesi përgatitor i zgjedhjeve duhet të vazhdojë, në mënyrë që IALtë të jenë gati të fillojnë fushatën zgjedhore menjëherë pas shpalljes së datës. Shpresoj që ky urdhër të mundësojë kthimin e vëmendjes së udhëheqësve të arsimit të lartë publik te planifikimi i mbylljes së suksesshme të vitit akademik për studentët", - u shpreh Shahini. Edhe Presidenti i Republikës, Ilir Meta, ka folur dje për vendimin e fundit për shtyrjen e zgjedhjeve në universitet. Meta tha se është një vendim i pritshëm dhe i arsyeshëm, për shkak të gjendjes së fatkeqësisë natyrore. "Mendoj se është një vendim i arsyeshëm dhe besoj se ishte i pritshëm, sepse në një periudhë të fatkeqësisë natyrore të vendosur nga parlamenti ishte jo e mundur për të pasur zgjedhje gjithëpërfshirëse", tha kreu i shtetit.
REAGIMI I REKTORIT
Pasi Ministria e Arsimit vendosi që të shtynte datën e zgjedhjeve në universitete për rektor dhe anëtarë senati, pati një reagim edhe nga rektori aktual i UT- së, Mynyr Koni. Përmes një postimi në "Facebook", Koni ka përshëndetur vendimin e MAS, që shtyhu zgjedhjet për shkak të fatkeqësisë natyrore të shkaktuar nga pandemia e COVID- 19. "Si rektor i Universitetit të Tiranës shpreh falënderimet dhe njëkohësisht përgëzimet e mia, për ministren e Arsimit, Sportit dhe Rinisë, për nxjerrjen e Urdhrit nr. 108 datë 08.05.2020, me të cilin shtyhet data e zgjedhjeve për autoritetet dhe organet drejtuese në institucionet publike të arsimit të lartë, për shkak të gjendjes së fatkeqësisë natyrore të shkaktuar nga pandemia e COVID- 19", - theksoi Koni. Mes të tjerash, ai garantoi se procesi zgjedhor që do të zhvillohet në Universitetin e Tiranës, do të përmbushë të gjitha parimet kushtetuese, do të zbatojë ligjin e arsimit të lartë dhe se do të jetë një proces transparent dhe gjithëpërfshirës. "Pas përcaktimit të datave nga ministri i Arsimit, Sportit dhe Rinisë për hapjen e procesit zgjedhor dhe datës së zhvillimit të zgjedhjeve, ju siguroj se autoritetet dhe organet drejtuese të Universitetit të Tiranës do të vijojnë në mënyrë të menjëhershme me përgatitjen e zgjedhjeve, me qëllim zhvillimin e tyre sipas të gjitha hapave dhe procedurave ligjore të përcaktuara në rregulloren e zgjedhjeve. Procesi zgjedhor që do të zhvillohet në Universitetin e Tiranës, do të përmbushë të gjitha parimet kushtetuese, do të zbatojë ligjin e arsimit të lartë 80/ 2015 dhe të gjitha aktet nënligjore në fuqi; do të jetë një proces transparent dhe gjithëpërfshirës", tha rektori.
PADIA NGA STUDENTËT
Studentët janë të vendosur për të vijuar deri në fund betejën për të fituar të drejtën e votës në zgjedhjet e Universitetit të Tiranës, të cilat u vendosën të bëhen pa votat e studentëve, për shkak të mbylljes së fakulteteve nga koronavirusi. Ditën e djeshme, studentë të Fakultetit të Drejtësisë kanë paditur ministren e Arsimit, Besa Shahini, ndërsa e paralajmërojnë se beteja për një universitet evropian vazhdon. "Prej tri vitesh marr leksione nga pedagogët e mi të drejtësisë mbi Kushtetutën, ligjin, shtetin e së drejtës, demokracinë dhe të drejtat e njeriut. Unë besoj te pedagogët e mi dhe dijet që ata më kanë transmetuar. Ndaj, gjatë kësaj jave bashkë me miq të Fakultetit të Drejtësisë dhe fakulteteve të tjera, me mbështetjen e ' Qëndresa Qytetare', kemi përdorur çdo mjet të ligjshëm për të garantuar të drejtën tonë për zgjedhje. Urdhri i sotëm i Ministres së Arsimit i dha pjesërisht të drejtë kauzës tonë. Beteja për një universitet evropian vazhdon. Zgjedhje me studentët, zgjedhje për studentët!", thuhet në mesazhin e një studenti, i cili publikon edhe padinë ndaj Shahinit.