Legalizimi i shtëpive, lista me pronarët që duhet të paguajnë tokën
Agjencia e Kadastrës publikon emrat e pronarëve në qarkun Tiranë
Pronarët që kanë ndër tuar pa leje në tokën e të tretëve, shtet ose privat, duhet të paguajnë faturën për parcelën që kanë zënë dhe më pas të marrin certifikatën e pronësisë. Agjencia e Kadastrës ka publikuar listën me pronarët që duhet të shlyejnë detyrimin për parcelën në Tiranë. "Personat që gjejnë emrin te listat të paraqiten pranë zyrës së marrëdhënieve me publikun për të tërhequr faturën e parcelës ndërtimore. Pasi të bëhet pagesa për truallin e zënë nga objekti informal, ju do të pajiseni me certifikatë pronësie duke qenë pronar legjitim të shtëpisë suaj", - thuhet në njoftim. Sipas ligjit, në fuqi çmimi i shitjes së parcelës ndërtimore për ndërtimet pa leje me funksion banimi ( përfshirë dhe shtesat në ndërtime me leje) llogaritet si përqindje mbi vlerën e pronës, sipas llojit "tokë truall", të miratuar me vendim të Këshillit të Ministrave. Për ndërtimet pa leje me funksion banimi, çmimi i shitjes për një metër katror është 50% e vlerës së përcaktuar për pasurinë "tokë truall", në njësinë administrative dhe zonën kadastrale përkatëse. Për ndërtimet pa leje të ndërtuara brenda territorit të njësive administrative fshat, kur çmimi për metër katror i përllogaritur sipas kësaj pike është më i vogël se 400 lekë apo më i madh se 1 500 lekë, çmimi që do të aplikohet për shitjen e parcelës ndërtimore do të jetë në këto vlera kufi. Për ndërtimet pa leje, të ndërtuara brenda territorit të njësive administrative qytet, kur çmimi për metër katror i përllogaritur sipas kësaj pike është më i vogël se 500 lekë apo më i madh se 2 000 lekë, çmimi që do të aplikohet për shitjen e parcelës ndërtimore do të jetë në këto vlera kufi. Për shtesat në ndërtime me leje, me funksion banimi, pavarësisht nga territori ku ato janë ngritur, kur çmimi për metër katror i përllogaritur sipas kësaj pike është më i vogël se 1 000 lekë apo më i madh se 3 000 lekë, çmimi që do të aplikohet për sipërfaqen përkatëse do të jetë në këto vlera kufi. Shlyerja e vlerës së parcelës ndërtimore nga poseduesi i ndërtimit pa leje bëhet pas njoftimit me shkrim nga Agjencia së Kadastrës, në të cilin janë përcaktuar vlera, mundësia për pagesën në pjesë, si dhe afatet e shlyerjes. Pagesë e menjëhershme do të konsiderohet shlyerja nga poseduesi i ndërtimit pa leje i vlerës së parcelës ndërtimore, brenda 45 ditëve nga data e njoftimit me shkrim.