"Në pritje të Venecias", mazhoranca shtyn me dy muaj "antishpifjen"
Soreca: Presim me padurim vendimin e komisionit. PD: Fitore e fjalës së lirë Meta mirëpret tërheqjen e PS- së: Reflektimi, pozitiv
Parlamenti shtyu dje për 2 muaj shqyrtimin e dekretit të Presidentit Meta për të ridiskutuar ndryshimet në projektligjin mbi mediat audio- vizive, pasi të shprehet për të Komisioni i Venecias. Në seancën e djeshme plenare ishte parashikuar votimi i dekretit të Presidentit Ilir Meta, por mazhoranca u tërhoq duke e shtyrë votimin deri në marrjen e opinionit të "Venecias". "Kjo automatikisht shtyhet", deklaroi kreu i deputetëve socialistë, z. Taulant Balla. Ai kërkoi që miratimi të shtyhet derisa "Venecia" të japë opinionin e saj. "Sapo më ka ardhur komunikimi edhe i Komisionit të Venecias, që ka pranuar ta shqyrtojë me procedurë të përshpejtuar këtë ligj me datë 20- 21 mars, ndërkohë që gjatë muajit shkurt përfaqësuesit e Komisionit të Venecias do vijnë në Tiranë për të dialoguar me ne, me këdo, opozitën parlamentare pa dyshim dhe me përfaqësues të organizatave në Shqipëri. Do të propozoja që votimi i dekretit për mediat audiovizive, jo për AKEP- in, se aty situata është e qartë dhe asnjë partner tek AKEPi nuk ka pasur asnjë lloj reference negative. Për sa i përket këtij dekreti, diskutimi për të të shtyhet derisa Komisioni i Venecias më 20- 21 mars të na sjellë raportin e vet", theksoi z. Balla. Mirëpo ky propozim i Ballës mori kundërshtimin e deputetes opozitare, Rudina Hajdari. "Duhet që zoti Balla ta kishte biseduar këtë me opozitën dhe pastaj të kishim rënë dakord. Diskutimin do ta vazhdojmë, kemi folës të regjistruar. Nëse është e mundur, dua ta marr fjalën. Ne duhet të kishim rënë dakord. E kuptoj se Balla do të dalë aty dhe të trumbetojë sikur ka bërë ndonjë heroizëm", - theksoi Hajdari.
REAGIMET
Vendim i mazhorancës u përshëndet edhe nga Presidenti Meta, që e quajti hap shumë pozitiv, me qëllim reflektimin për çështjet e ngritura. Në një prononcim për median, Ilir Meta e quajti hap pozitiv. "Reflektimi i shërben qëllimit më të madh të përbashkët, që është mbrojtja e të drejtave kushtetuese të të gjithë qytetarëve shqiptarë si dhe në rastin konkret, edhe garantimin e standardeve demokratike europiane. Nuk është humbje për askënd, aq më tepër që dihen shqetësimet serioze që kishin ardhur nga ndërkombëtarët. Mendoj se është pozitiv", shprehet z. Meta. Mazhoranca shtyu votimin deri në marrjen e opinionit të ' Venecias'. Ndryshimi i qëndrimit nga maxhoranca erdhi një ditë pasi raporteri për Shqipërinë në Grupin PPE të Parlamentit
Evropian i bëri thirrje qeverisë të tërhiqet nga miratimi i kësaj pakete, pasi rrezikojnë seriozisht hapjen e negociatave. "Po përsëris qëndrimin tim mbi rrezikun që mbartin ligjet e reja për median në lidhje me çeljen e mundshme të negociatave me BE- në. Grupi PPE i Parlamentit Evropian beson fort në çeljen e negociatave të anëtarësimit me Shqipërinë. Por Shqipëria duhet të respektojë kriteret e Kopenhagenit, që janë një standard bazik e minimal për një vend kandidat. Nëse qeveria ' Rama' do të miratojë në Kuvend ligjet në formën aktuale, atëherë ajo po vë në rrezik serioz shansin për çeljen e negociatave të anëtarësisë në BE- së. Qeveria ' Rama' duhet patjetër të përmbushë rekomandimet specifike të dhëna nga Komisioni Evropian dhe nga Këshilli i Evropës". Një reagim bëri edhe ambasadori i Bashkimit Europian në Tiranë, Luigi Soreca, që inkurajoi autoritetet të adresojnë shqetësimet e organizatave të mediave dhe komunitetit ndërkombëtar. "Ne e mirëpresim vendimin e mazhorancës në pushtet për të shtyrë votën për ligjin për mediat audio- vizive. Presim me padurim mendimin e Komisionit të Venecias dhe inkurajojmë autoritetet të adresojnë shqetësimet e mbetura të organizatave të mediave dhe komunitetit ndërkombëtar", shkruan Soreca. Edhe PD- ja reagoi me anë të ish- deputetes Albana Vokshi, e cila e konsideroi një fitore të fjalës së lirë. Paketa "antishpifje" është kundërshtuar fort nga përfaqësuesit e medias në Shqipëri dhe faktori ndërkombëtar. Komisioni i Venecias ka caktuar datën 20 mars për shqyrtimin e paketës "antishpifje", seancë në të cilën do të përballet mazhoranca me Këshillin e Europës.