21 janari, Meta: Tragjike, kur opozita përdor dhunën për të arritur objektivat
Presidenti: Nuk ka asnjë fuqi në botë të më bëjë presion në raport me Kushtetutën "Zgjedhorja nuk mjafton, dialog edhe për çështje të tjera"
Presidenti i Republikës Ilir Meta e quan tragjike kur opozita përdor dhunën për të arritur objektivat e saj politike. Në një rast të tillë, z. Meta iu referua dje ngjarjes së 21 janarit 2011, ku në protestën e PS- së, opozitë në atë kohë humbën jetën 4 protestues. Presidenti u shpreh se është tragjike, kur opozita përdor dhunën për të arritur objektivat, ndërsa theksoi se duhet të heqim dorë një herë e përgjithmonë nga dhuna si një mjet i arritjes së qëllimeve politike. "21 janari është një datë shumë e rëndësishme, sepse është dita e Kongresit të Lushnjës. Ne sot kemi 100vjetorin e kësaj ngjarjeje, më e rëndësishmja pas shpalljes së Pavarësisë së Shqipërisë në Vlorë, pasi në vetvete është një rivendosje e pavarësisë dhe e organizimit të shtetit shqiptar dhe e të gjitha institucioneve, por edhe një fillim i parlamentarizmit në Shqipëri. Në këtë drejtim është një nga ditët më të rëndësishme të shtetformimit tonë dhe që na kujton se sa e rëndësishme është që të forcojmë institucionet. Sa i takon 21 janarit tjetër, sigurisht që nuk kemi asnjë arsye për t'u krenuar. Është një ngjarje që na kujton se sa tragjike është kur opozita përdor dhunën për të arritur objektiva politike të pandershme. Dhe se sa e rëndë është kur instrumentalizohen qytetarët për qëllime të tilla, sidomos kur nxiten në rrugën e dhunës. Kjo ngjarje na kujton se duhet të heqim dorë një herë e përgjithmonë nga dhuna si një mjet i arritjes së qëllimeve politike", - theksoi z. Meta në një intervistë për ABC News.
REFORMA
Pas një viti krizë të fortë politike e institucionale, 2020a ka nisur me paqëtim të mazhorancës e opozitës, të cilat arritën vetë një dakordësi për të finalizuar reformën zgjedhore. Për kreun e shtetit kjo nuk duket e mjaftueshme. Tryeza për reformën zgjedhore i duket shumë e ngushtë e propozon që të zgjerohet edhe me çështje të tjera. "Eshtë hap pozitiv, sepse përfundimi i reformës zgjedhore është kërkesa e Bundestagut dhe gjithë procesit të kushtëzuar për hapjen e negociatave. Shpresoj të mos ketë surprizë tjetër rrugës. Edhe sikur ky hap të jetë pozitiv, është fare pak edhe tepër vonë. Kërkohet një tryezë tjetër shumë e thellë më e përgjegjshme për të plotësuar të gjitha detyrimet. Duhet të shkojë përtej reformës zgjedhore, sepse ajo nuk do të zgjidhë ndonjë gjë të jashtëzakonshme",- tha Presidenti. Edhe vetë kreu i shtetit ndihet më i qetë në vitin 2020. Nuk ka dyshim se është i pamundur realizimi i shkarkimit të tij, edhe pse ligjërisht do vijojë mbrojtjen edhe në komisionin e Venecias, aty ku po përgatitet të dërgojë një seri pyetjesh të tjera pas pyetjeve që dërgoi parlamenti, lidhur me kontestimin e një anëtareje të Gjykatës Kushtetuese.
SHKARKIMI
Presidenti Meta i ka qëndruar vendimeve dhe opinioneve të tij në lidhje me kompetencat e Presidentit në raport me Kushtetutën. Meta tha për ABC News se është i detyruar t'i drejtohet Komisioni i Venecias, pasi Kuvendi ka vënë në diskutim kompetencat e Presidentit, dhe si e tillë, edhe Presidenti duhet t'i drejtohet Venecias në lidhje me parlamentin. Po ashtu Presidenti u shpreh se, nuk kishte asnjë forcë në botë, që mund t'i bënte presion, në raport me ligjin, dhe bindjet e tij politike. Meta theksoi, gjithashtu, se Kuvendi, edhe tani pas 3 javëve, nuk ka bërë ende publik, të gjithë parashtrimin apo komunikimin zyrtar, të Kuvendit me Komisionin e Venecias. Ai deklaroi në mënyrë të prerë se: "nuk ekziston mundësia nga asnjë fuqi në botë që të më bëjë mua presion në raport me Kushtetutën, në raport me ligjin dhe në raport me bindjet e mia politike". Meta foli për Komisionin Hetimor të ngritur nga parlamenti për shkarkimin e tij. Sipas Metës, ky komision po vazhdon të operojë në mënyrë anti- ligjore dhe anti- kushtetuese, pasi presidenti mund të shkarkohet vetëm për shkelje të rënda kushtetuese, të natyrës që mund të cenojnë sovranitetin e vendit. Duke hequr një paralele mes vetes, kryeministrit dhe parlamentit, Meta deklaroi se presidenti vepron përmes dekreteve ashtu si parlamenti vepron përmes ligjeve. "Shumë ligje të Kuvendit dhe vendime të qeverisë janë rrëzuar nga Gjykata Kushtetuese, por ata nuk janë shkarkuar nga detyra",- tha Meta.