Rritet numri i pjesëmarrësve në zgjedhje, KQZ: Votuan 22.97 për qind
KQZ publikoi dje të dhënat e reja. Sipas saj, në votime morën pjesë 812 mijë zgjedhës Plot 50 mijë zgjedhës e bënë votën e tyre të pavlefshme
Ka përfunduar brenda 48 orëve nga mbyllja e procesit të votimit numërimi i votave për kryetarë bashkie dhe anëtarë të këshillave bashkiakë. Komisioni Qendror i Zgjedhjeve e ka konsideruar dje të mbyllur këtë proces, ndërsa ka bërë të ditur edhe disa fakte të reja që kanë të bëjnë kryesisht me pjesëmarrjen zyrtare të zgjedhësve në votime si dhe numrin e përgjithshëm të votave të pavlefshme. Kështu, ndryshe nga sa kishte deklaruar të dielën në darkë, numri i pjesëmarrjes së zgjedhësve në votime nuk është 771 mijë zgjedhës, por plotë 812 mijë ose thënë ndryshe 22.97 për qind të të gjithë atyre që kishin të drejtë vote. "Sipas të dhënave paraprake të raportuar nga KZAZ- të në sistemin elektronik të të dhënave të KQZ- së, rezulton se kanë marrë pjesë në votime 812.249 zgjedhës, ose 22.97% e numrit të përgjithshëm të zgjedhësve prej 3.536.016", - bëri të ditur zëdhënësja e KQZ- së, Drilona Hoxhaj, në një dalje të posaçme për mediat. Një shifër domethënëse kjo dhe që favorizon PS- në, pasi nëse të gjithë ata që morën pjesë në zgjedhje do t'i konsiderojmë si mbështetës të së majtës, atëherë rezulton se
ajo zotëron mbështetjen e më shumë se gjysmës së zgjedhësve që marrin zakonisht pjesë në votime. Kështu, duke iu referuar disa zgjedhjeve të fundit qofshin ato lokale apo qendrore, numri i atyre që kanë votuar ka qenë mesatarisht 1.6 milionë persona. Ndërkohë që një fenomen që është vënë re në këto zgjedhje është edhe ai votave të pavlefshme. Zëdhënësja e KQZ- së bëri të ditur se ky numër është konsiderueshëm dhe disa herë më i lartë i krahasuar me zgjedhjet e shkuara të të njëjtit lloji. "Numri i përgjithshëm i votave të pavlefshme për kryetar bashkie është 45.276, ndërsa për këshillat bashkiak është 49.986. Në këto të dhëna mungojnë numri i fletëve të votimit të dëmtuara apo të hedhura në kutinë e gabuar", - tha Hoxhaj. Një e dhënë kjo që tregon qartë se zgjedhësit janë të pakënaqur me të dyja palët, si me metodat e ndjekura nga opozita për t'iu imponuar mazhorancës, ashtu edhe me qeverisjen e socialistëve. Gjithashtu, kjo përqindje e madhe e votave të pavlefshme mund të lidhet edhe me detyrimin që administrata shtetërore i ka bërë punonjësve të saj për të marrë pjesë në zgjedhje. Ndërkohë që menjëherë pas përfundimit të procesit të numërimit dhe miratimit me vendim të tabelës së rezultateve nga KZAZ- të për zonat përkatëse të administrimit zgjedhor, KZAZ- të kanë nisur dorëzimin në KQZ të kutive të votimit dhe kutive me materialet zgjedhore, sipas procedurave të përcaktuara nga Kodi Zgjedhor. "Duke marrë shkas nga ambiguiteti dhe disa keqinterpretime që janë vërejtur këto ditë lidhur me shifrat paraprake që KQZ me të drejtë vlerësoi të publikonte për të informuar publikun e interesuar, theksojmë se rezultati përfundimtar zyrtar do të shpallet vetëm pas përfundimit të afateve ankimore në rrugë administrative pranë KQZsë apo ankimimeve të mundshme në Kolegjin Zgjedhor", - tha Hoxhaj.