Ilir Meta: Lleshi, nuk pranoj presione, zbatoj Kushtetutën
Presidenti: Nuk e kam numrin e Ramës. Komunikimet tona bëhen përmes sekretarëve “Shkarkimi? S’ka asnjë shans ta lë Presidencën”
"Në këtë situatë që është vendi s'ka asnjë shans të lë Presidencën se është një institucion tepër i rëndësishëm për të mbrojtur nivelin e demokracisë që është në momente kritike. Presidencën do ta vazhdoj me përgjegjësi maksimale. Para së gjithash interesi kombëtar", tha z. Meta.
PËR VITORE TUSHËN
“Dua t’i kontribuoj forcimit të pavarësisë së këtij institucioni. Është një institucion që bën vetingun e të gjithë institucioneve të tjerë në administrimin financiar. Duke qenë se ka një karrierë shumë solide në fushën e drejtësisë, s’ka pasur angazhim në politikë. Është një figurë me shumë integritet , do t’i kontribuonte forcimit të mëtejshëm të pavarësisë në këtë pozicion kyç”, - tha z. Meta.
Një ditë përpara afatit të fundit për të vendo sur mbi kërkesën e dytë të Kryeministrit Edi Rama, për të dekretuar gjeneral Sandër Lleshajn si ministër të Brendshëm, Presidenti i Republikës Ilir Meta shprehet se nuk ndikohet nga presionet. Pak orë përpara skadimit të këtij afati të dytë 7- ditor sipas përcaktimit në Kushtetutë, kreu i shtetit nuk jep një përgjigje për vendimin e tij, por thotë se e di si funksion Kushtetuta për shkak të karrierës së tij politike. Presidenti i Republikës, Ilir Meta, i ftuar mbrëmë në ' Open' u shpreh se nuk do t'ia lejonte asnjëherë vetes të shkelte Kushtetutën, teksa po fliste për çështjen e dekretimit të kandidaturës së Sandër Leshajt si ministër i Brendshëm.
Z. President përse nuk e dekretuat z. Sandër Lleshaj ministër të brendshëm?
Që ditën që kam pranuar këtë detyrë, e cila është detyra e lartë në vendin tonë dhe kam vënë dorën mbi Kushtetutë kam marrë përsipër të gjithë përgjegjësitë për të respektuar Kushtetutën. Për rastin konkret është krijuar një situatë, por jo nga mua. Jam i bindur që kam vepruar në interes të respektimit të Kushtetutës dhe interesit publik dhe kam për të gjitha përpjekjet e mia për të dhënë një zgjidhje të drejtë. Çështja e emërimit të një ministri, është një çështje që kërkon bashkëpunimin e tri institucioneve, Kryeministrit, Presidentit dhe Kuvendit.
Cila është arsyeja e rrëzimit të dekretit të parë?
Çështja është më e qartë për opinionin pas iniciativës së dytë të Ramës për të propozuar sërish kandidaturën e zotit Lleshi. Pyetjet që unë bëra publike e sqarojnë. Kemi të bëjmë me sqarimin e situatës së ushtarakut dhe ministrit të cilat janë të papajtueshme me Kushtetutë. Unë nuk kam marrë asnjë vendim. Unë po bashkëpunoj për të sqaruar. Ne po vazhdojmë diskutimet aktualisht. Një shkelje e qartë e Kushtetutës është një përgjegjësi e madhe e presidentit.
Si i komentoni deklaratat e kryeministrit Rama në Kuvend për shkelje të Kushtetutës?
S'më shqetëson se e di shumë mirë Kushtetutën e Shqipërisë. Unë u lodha me këto lavdërime, por për fat të mirë apo të keq përsëri vazhdoj të bëj detyrën si më parë, në kuptimin e lartësisë së detyrës për të respektuar Kushtetutën. S'kam ndërmend të bëj asnjë dëm se të tregoj kulturën e bashkëpunimit institucional. E rëndësishme mos të shpenzojmë energji për konflikte të panevojshme. Me rëndësi është presidenti të veprojë mbi Kushtetutën dhe mos lejojë cenimin e Kushtetutës. Nuk është kryeministri autoriteti që mund të sqarojë këtë situatë. Rasti në fjalë është përgjegjësi e ministrisë së Mbrojtjes dhe Shtabit duke qenë se kemi të bëjmë me një gjeneral me gradë madhore.
Z. Lleshaj përmes një letre dërguar ju ka kërkuar që ta ç'dekretoni… Cila është përgjigjja juaj për të?
Nuk kam arsye t'i përgjigjem drejtpërdrejt. E kam marr letrën e tij, është në tryezën tonë, por mënyra si funksionon zgjidhja është nga Ministria e Mbrojtjes te Presidenti, sepse nëse gjithë gjeneralët sot gjejnë një vend me rrogë 2- 3 herë më të lartë dhe lënë ushtrinë dhe presidenti firmos këtë kërkesë, mbetet ushtria pa komandë.
A do ta dekretoni z. Sandër Lleshaj?
Është mjaft e rëndësishme që presidenti të veprojë në përputhje me Kushtetutën. Nuk kam marrë asnjë vendim. Vendimi im është që po bashkëpunojmë. Po vazhdojmë këtë proces me Ministrinë e Mbrojtjes, e cila është ministria përgjegjëse për këtë çështje.
Një koment tuajin për ministrin e dorëhequr Fatmir Xhafaj?
Bëri përpjekje të rëndësishme për të rivendosur një autoritet të policisë në luftën kundër krimit dhe një ndarje për një periudhë të mëparshme
Kryeministri Rama deklaroi në një emision televiziv se: "Do ia marr Presidentit ( Ilir Meta) se e ka mik Gruevksin", si përgjigje ndaj asaj çfarë i tha gazetari Nikoll Lesi: Merri një numër Gruevksit ta kesh rezervë, se s'i dihet…
Unë jo vetëm numrin e Gruevskit nuk e kam dhe as e kam pasur ndonjëherë, por as numrin e Ramës nuk e kam prej disa muajsh pasi kam ndërruar telefon. Po komunikojmë përmes shefave të kabinetit dhe sekretarëve të përgjithshëm.
A mund t'ju shkarkojë mazhoranca nga posti i Presidentit?
Në këtë situatë që është vendi s'ka asnjë shans të lë Presidencën se është një institucion tepër i rëndësishëm për të mbrojtur nivelin e demokracisë që është në momente kritike. Ka shumë element që kanë të bëjnë me Shqipërinë civile, me të drejtat e gazetarëve, me të drejtat e sipërmarrjen. Presidenti ka përgjegjësi që të mbrojë liritë. Presidencën do ta vazhdoj me përgjegjësi maksimale. Para së gjithash interesi kombëtar.
Kush janë përgjegjësit për këtë situatë?
Përgjegjës janë të gjithë ata që mendojnë se shkelja e Kushtetutës s'është ndonjë gjë e madhe. Pastaj edhe qytetarët e kuptojnë kur të drejtat e tyre shkelen
Të ndalemi pak te ngjarja e ' Bularatit'…
Është e rëndësishme të bëhet një analizë e plotë e të gjithë administrimit të një situate të tillë, pasi duhet të përgatitemi me provokime të tilla, pasi duket se nuk kemi të bëjmë me një rastësi. Këtë e kam thënë prej kohësh dhe i kam paralajmëruar shërbimet tona të hapin sytë