Basha: Nëse e duam BE, Tahiri në burg dhe Xhafaj të largohet
Mesazhet e deputetit të Merkelit, kreu i PD- së: Qeveria, ' lakuriq' para botës "Fasada ra, po pengohet integrimi"
Kreu i opozitës, Lulzim Basha, i bën thirrje kryeministrit Rama të heqë dy pengesat e mëdha që sipas tij mbajnë peng rrugëtimin europian të Shqipërisë, të çojë në burg Saimir Tahirin dhe të largojë Fatmir Xhafajn nga Ministria e Brendshme. Duke cituar deklaratat e fundit të Johan David Wadephul, nënkryetar i partisë së kancelares Merkel, z. Basha i beri sërish thirrje kryeministrit Edi Rama që të largojë nga qeveria ministrin Fatmir Xhafaj dhe t'i japë fund mbrojtjes politike që po i bën Saimir Tahirit. "Kur na ndajnë vetëm 2 javë nga vendimi për hapjen e negociatave për anëtarësimin e Shqipërisë në familjen europiane, mesazhet e Europës po bëhen çdo ditë e më të qarta. Hapja e negociatave dhe integrimi i Shqipërisë në BE nuk është proces reklamash dhe lobimesh personale. Është një proces i vërtetë i veprimit dhe sjelljes si europiane. Strategjia e Edi Ramës përmes krijimit të një fasade të rremë që gjërat në Shqipëri shkojnë mirë, ka dështuar. Fasada ka rënë. Qeveria është lakuriq para botës. Sot nuk ecin më gënjeshtrat, mashtrimet, kërcënimet dhe fajësimet e të tjerëve", tha z. Basha. Nisur nga kjo, ai kërkoi: "Tahiri duhet të jetë aty ku e kanë vendin trafikantët. Nëse duam Evropën, Xhafaj duhet të largohet një orë e më parë. Qeveria duhet të luftojë e jo të mbrojë korrupsionin krimin e trafikun. Të bëjmë reformë zgjedhore e ndalim shitblerjen e zgjedhjeve. Rama, Tahiri, Xhafaj janë sot pengesat kryesore të integrimit në BE. Është e qartë se çfarë duan shqiptarët, hapjen e negociatave, ndaj është urgjente largimi i Xhafajt dhe dhënia fund e mbrojtjes politike që Rama po i bën Tahirit. Rama duhet t'i bindet vullnetit të shqiptarëve, ose duhet të largohet". Mesazhet e dy ditëve
më parë të zv. kryetarit të Grupit Parlamentar CDU/ CSU se Shqipëria nuk ka plotësuar asnjë kusht për hapjen e negociatave, se Tahiri është "peshk i madh" dhe Xhafaj duhet të largohet, sipas Bashës janë pasqyra e vërtetë e gjendjes në Shqipëri dhe prova se gënjeshtrat nuk ecin. "Zgjedhja që kemi sot përpara nesh është e qartë: nëse duam Europën, Samir Tahiri duhet të jetë aty ku e kanë vendin
trafikantët dhe pushtetarët e lidhur me trafikantët. Është e qartë se çfarë duan shqiptarët, shqiptarët duan Europën. Shqiptarët duan hapjen e negociatave, ndaj është urgjent largimi i Fatmir Xhafaj dhe dhënia fund e mbrojtjes politike që Rama po i bën Saimir Tahirit. Zgjedhja është e shqiptarëve dhe jo e Edi Ramës. Edi Rama duhet t'i bindet vullnetit të njerëzve, ose të largohet", theksoi kreu i PD- së. "400 mijë shqiptarë të ikur në vitet e fundit nga papunësia dhe varfëria, çfarë janë për këtë kryeministër? Turp dhe faj i rëndë të tallesh me varfërinë, ky e bën dhe kjo i jep kënaqësi. Papunësia është kthyer në tragjedinë e vërtetë të Shqipërisë. Kryeministri do vazhdojë të gënjejë, sepse atij si Shvejkut, nuk i duhet gjë se çfarë thotë vetë", tha z. Vasili.