Përkeqësohet situata në Shkodër, 300 shtëpi e 5 mijë ha tokë nën ujë
Përmbytjet, KESH i akordon Ministrisë së Mbrojtjes 10 milionë lekë Lokalët: 69 persona janë akomoduar në konvikt
Shkodra vijon të jetë nën pushtetin e ujit. Burime zyrtare nga Shtabi i Emergjencave Civile dje bënë me dije se stuhia e shirave ka përkeqësuar situatën në këtë qark. Mësohet se sipërfaqja e përmbytur ka arritur në 4958 ha tokë, ndërsa mbi 300 shtëpi janë të rrethuara nga uji. Ndërkohë që mbetet problem mungesa e energjisë elektrike në disa zona. Shtyllat e energjisë elektrike janë dëmtuar dhe kërkohet ndërhyrja e OSHEE- së. Uji nuk ka kursyer as shkollat, disa prej të cilave kanë prezencë uji. Sipas burimeve të mësipërme, 69 persona janë akomoduar në konvikt. Ndërkaq, Korporata Elektroenergjetike Shqiptare i ka akorduar Ministrisë së Mbrojtjes 10 milionë lekë të reja për përballimin e situatës së krijuar nga përmbytjet në Shkodër. Në njoftimin e KESH thuhet se ky institucion solidarizohet me operacionet e gjithanshme të strukturave shtetërore që po menaxhojnë vështirësitë e krijuara në zonën veriore të vendit nga reshjet e dendura dhe të tejzgjatura të muajit mars 2018. "Organet drejtuese të Korporatës i kanë akorduar Ministrisë së Mbrojtjes një fond prej 10 milionë lekë të reja si kontribut për përballimin e nevojave jetësore të familjeve të shpërngulura. Korporata, ndërkohë që vijon të ndjekë në dinamikë ecurinë e parametrave hidroenergjetikë në kaskadë dhe të operojë veprat energjetike brenda përgjegjësisë së saj ligjore dhe përcaktimeve rregullatore, po bashkërendon informacionin në kohë reale me të gjitha strukturat e pushtetit qendror dhe lokal dhe emergjencat civile",- thuhet në njoftimin e KESH.
SITUATA
Pas inspektimeve në terren të bëra nga Bashkia Shkodër rezulton se në njësinë administrative Dajç janë përmbytur 1750 ha tokë, ndërsa kërkohet të ndërhyhet për lartësimin e argjinaturës së Pentarit, Shirqit dhe Darragjatit. Rrugët Shirq- Darragjat; Belaj- Pentar, Bishti i Qarrit dhe Urrela janë të bllokuara. Në ambientet e disa shkollave ka prezencë uji, ndërsa kanë rënë disa shtylla të energjisë elektrike në rrugën e Dajçit. Paraqitet shumë e nevojshme vendosja e shenjave orientuese në rrugë për të bërë të mundur kalimin. Janë mbi 300 shtëpi të rrethuara nga uji. Kërkohet furnizim me ujë të pijshëm për banorët. Në njësinë administrative Ana e Malit janë përmbytur 1300 ha
tokë. Ujësjellësi ' Oblika 1' dhe ' Oblika 2' janë jashtë funksionit. Kërkohet furnizimi me ujë të pijshëm për banorët dhe nevojiten çizme të gjata për banorët. Lagjja Goricë është totalisht e izoluar. Janë 177 shtëpi të rrethuara nga uji, 150 në Obot dhe 27 në Goricë. Në njësinë administrative Bërdicë janë përmbytur mbi 1280 ha tokë. Stacioni i pompave të Ujësjellësit në Trush si pasojë e përmbytjeve është jashtë funksionit. Janë 100 shtëpi të rrethuara nga uji. Në njësinë administrative Velipojë janë të përmbytura mbi 410 ha
tokë. Në fshatin Luarz, del uji nën argjinaturë. Ndërsa, në atë të Çasit paraqiten shumë probleme. Fshati Luarz është pa energji elektrike. Në njësinë administrative Rrethina janë të përmbytura 70 ha tokë. Në zonën e Livadheve janë 17 shtëpi të rrethuara nga uji. Në 3 shtëpi ka hyrë uji brenda. Në
njësinë administrative Gur i Zi vazhdon gërryerja e tokës në fshatin Juban, në afërsi të Malit të Vukatanës. Në qytetin e Shkodrës, e konkretisht në zonën e Livadheve janë të përmbytura 135 ha tokë. Në këtë rrugë ndodhen mbi 70 shtëpi me prezencë uji afër oborreve të tyre. Me shumë vështirësi
kalohet me makinë ushtrie, ndërsa në disa zona kalimi bëhet i mundur vetëm me varkë. Në lagjen "Ajasëm" janë rreth 3 ha tokë e mbuluar nga uji. Në 13 banesa ka prezencë uji. Bashkia Shkodër ka bërë evakuime të banorëve dhe gjësë së gjallë kur janë paraqitur nevoja, ndërsa 69 persona të akomoduar në konvikt. Gjithashtu, Bashkia Shkodër ka bërë të mundur edhe lëvizjen e banorëve dhe akomodimin e tyre tek të afërmit e tyre. Ndërkaq, specialistët tanë janë në terren, dhe po bëjnë vlerësimet e dëmeve të shkaktuara.