Thaçi nderon Ramën me Medaljen e Pavarësisë: Zë i fuqishëm mbështetës

Sot Kosova 10 vjet shtet, arrin marrëveshjen për Demarkacionin me Malin e Zi Kryeministri: Pakti me Malin e Zi hap lëvizjen e lirë

Kryetari i PD- së, Lulzim Basha përshëndeti dje, arritjen e marrëveshjes mes presidentëve të Kosovës dhe Malit të Zi për demarkacionin. "Në këtë përvjetor të dhjetë të Pavarësisë ky është një lajm i mirë për Kosovën. Marrëveshja është një akt i qartë i bashkërendimit të Kosovës me aleatët tanë euroatlantikë", - tha dje, Basha. "Shpreh bindjen se votimi i saj në parlamentin e Kosovës meriton vlerësimin e duhur nga institucionet europiane dhe se do të shpejtojë hapat e Kosovës drejt integrimit europian",- u shpreh ai. Ministria për Evropën dhe Punët e Jashtme mirëpret hapin e hedhur mes Kosovës dhe Malit të Zi, drejt përfundimit të demarkacionit të kufirit mes dy vendeve dhe e konsideron atë si dëshmi konkrete të vullnetit të të dyja vendeve për të forcuar marrëdhëniet dhe për të kontribuar në mënyrë thelbësore në forcimin e stabilitetit dhe bashkëpunimit në Ballkanin Perëndimor.

Kryeministri Edi Rama u nderua dje, me Medaljen presidenciale të Pavarësisë nga Presidenti i Republikës së Kosovës, Hashim Thaçi. Medalja iu dorëzua Kryeministrit Rama në një ceremoni të veçantë Prishtinë nga Presidenti Thaçi, në prag të kremtimit të 10- vjetorit të Pavarësisë, për "kontributin e dhënë për lirinë dhe Pavarësinë e Kosovës". "Sot pata nderin dhe kënaqësinë, me autoritetin tim kushtetues dhe ligjor të ndaj Medaljen Presidenciale me rastin e 10vjetorit të Pavarësisë për Kryeministrin e Shqipërisë, për kontributin e tij në lirinë dhe pavarësinë e Kosovës, duke çmuar dhe respektuar shumë angazhimet e konsolidueshme në proceset më të vështira që ka kaluar vendi. Zëri i Edit ka qenë i fuqishëm në mbështetje të lirisë së Kosovës, në mbështetje të shtetndërtimit, konsolidimit dhe të integrimit sa më të shpejtë të Kosovës në NATO dhe në Bashkimin Europian,"- u shpreh ndër të tjera Presidenti i Kosovës, Hashim Thaçi.

Mirënjohës për këtë vlerësim të lartë, Kryeministri Rama u shpreh se "është një nga momentet më emocionuese dhe një nder i jas- htëzakonshëm. Dua t'ju shpreh të gjithë mirënjohjen time, juve personalisht dhe dua të falënderoj Kosovën për këtë emocion kaq të paharrueshëm!". Kryeministri Rama, gjithashtu, përgëzoi Kosovën për finalizimin e Marrëveshjes së Demarkacionit me Malin e Zi, duke e konsideruar këtë si një hap të rëndësishëm drejt integrimit të mëtejshëm europian të Kosovës. "Zoti President, unë dua t'ju përgëzoj për atë që ju bëtë, së bashku me Presidentin e Malit të Zi, si një hap i vendosur drejt finalizimit të një procesi që, uroj dhe shpresoj do të mbyllet në këtë moment historik të përvjetorit të 10- të të Pavarësisë, për t'i hapur rrugën përfundimisht Kosovës dhe të gjithë qytetarëve të saj, që si të gjithë të tjerët të lëvizin lirisht, por jo vetëm për këtë, por edhe për të dëshmuar seriozitet dhe përkushtim nga shteti i Kosovës në arenën ndërkombëtare, si një shtet që di të bëjë marrëveshje dhe di të respektojë marrëveshje,"- deklaroi Kryeministri Rama.

MARRËVESHJA

Presidenti i Kosovës, Hashim Thaçi dhe homologu i tij nga Mali i Zi, Filip Vujanoviç nënshkruan dje, një marrëveshje të përbashkët për t'i hapur rrugë ratifikim- it të Marrëveshjes për Demarkacionin me Malin e Zi, të nënshkruar në vitin 2015. Në një konferencë për shtyp, presidenti Thaçi theksoi se "me domosdoshmërinë e lëvizjes sa më të shpejtë të perspektivës evropiane dhe fuqizimit të fqinjësisë së mirë dhe domosdoshmërisë për ratifikim duke vlerësuar dhe vullnetin e mirë të Malit të Zi dua të shpalos para jush që në 48 orët e fundit unë si President dhe Presidenti i Malit të Zi nxorëm një deklaratë të përbashkët që i inkurajojmë Kuvendin e Kosovës ta ratifikojë marrëveshjen për kufirin". Republika e Kosovës dhe Malit të Zi me vullnet të mirë duke respektuar fqinjësinë e mirë, sovranitetin, integritetin territorial dhe pavarësinë e të dy shteteve, me respektimin e parimit pacta sunt servanda pajtohen si në vijim: "Republika e Kosovës do të procedojë në Kuvendin e Kosovës dhe do të ofrojë të gjitha përpjekjet për të ratifikuar marrëveshjen sipas nenit 12 të Marrëveshjes. Republika e Kosovës dhe Mali i Zi pas ratifikimit njoftojnë njëratjetrën që kanë përmbushur procedurat e tyre të brendshme ligjore përmes kanaleve diplomatike dhe konstatohet se marrëveshja që ka hyrë në fuqi do të formojë një trup të përbashkët punues për shënjimin e vijës kufitare".