Rama: Përmbytjet, edhe nga zjarret e verës, përfituan nga qeveria teknike
Kryeministri e ministrja e Mbrojtjes vizitojnë zonat e përmbytura në Fier e Vlorë "Do shtrëngojmë ligjet, nuk do falim askënd që luan me pasurinë"
Kryeministri Edi Rama inspektoi dje, zonat e përmbytura në jug të vendit, duke e nisur nga Fieri e më pas në Vlorë, shoqëruar nga ministrja e Mbrojtjes Olta Xhaçka e deputetët e zonave. Në takimin e fundit që pati në Vlorë, Rama tha se dëmet e shkaktuar erdhën edhe si pasojë e zjarreve që ranë gjatë verës. "Ne kemi filluar që tani të marrim masa për verën e ardhshme, do shtrëngojmë shumë fort edhe legjislacionin dhe nuk do falim askënd që do luaj me këtë pasuri, sepse përfituan nga qeveria teknike vjet",- u shpreh Rama. Duke u ndalur në zonat kritike të Fierit, pas një nate të rënduar nga reshjet e prurjet e lumit, kryeministri pa nga afër problematikën e krijuar pas vërshimit të ujërave. "Është pozitive kësaj radhe, që s'kemi asnjë humbje në gjënë e gjallë të raportuar nga fermerët në gjithë këto zona", - u shpreh kryetari i Bashkisë, Armando Subashi. Kryeministri vlerësoi maksimalisht angazhimin dhe bashkëpunimin e të gjithë strukturave operacionale në vend, për të përballuar këtë fatkeqësi, e cila, pavarësisht se ishte më e rëndë se ajo e 2015, solli më pak dëme për shkak të masave të marra paraprakisht nga gjithë strukturat e përballimit të situatave të tilla. "Ishte shumë e frikshme situata, sepse faktikisht tejkaloi 2015n në mënyrë shumë tej parashikimit dhe ishte një sprovë e madhe për të gjithë ndërhyrjet që kemi bërë, por që treguan dobishmërinë e tyre. Tani, duke u nisur nga pikat e dobëta të kësaj situate, duhet që të vazhdojmë ndërhyrjet aty ku faktikisht identifikohet domosdoshmëria për krijimin e infrastrukturës së sigurisë dhe të mbrojtjes, në mënyrë që të kemi shumë më tepër imunitet kur të vijë tjetra, se tani këto janë bërë ciklike për shkak edhe të gjithë ndryshimeve të klimës",- u shpreh kryeministri. Më tej, në Novoselë, kryeministri u përshëndet me ushtarakët e përfshirë në këto operacione, duke i falënderuar për përkushtimin e lartë profesional e njerëzor, duke qenë në vijën e parë të përpjekjeve për përballimin e situatës dhe shpëtimin e jetës njerëzore. "Keni bërë një punë shumë fantastike. Të gjithë e kanë parë dhe e gjithë Shqipëria ua di për nder. Jam shumë krenar për ju." Rama u ndal edhe në Pallatin e Sportit në qytetin e Vlorës, ku ishte ngritur qendra për të pritur qytetarë, shtëpitë e të cilëve mund të rrezikohen nga përmbytjet. Kryeministri Rama, i shoqëruar nga ministrja e Mbrojtjes Olta Xhaçka, kryetari i Bashkisë Dritan Leli tha se, "Ajo që është më e rëndësishme, është që jo vetëm asnjë jetë njeriu, por nuk ka asnjë kokë bagëti të humbur, as në Vlorë, as në Fier, asgjëkund, si pasojë e organizimit që bëmë prej javësh me forcat e armatosura, me policinë, me emergjencat, me grupe të pesëfishuara forcash në krahasim me 2015, për ta përballuar situatën."