Vidhnin banesat në Kamëz, bien në pranga dy të rinj, tre të tjerë në kërkim
TIRANE- Policia e Tiranës vijon përpjekjen për goditjen e grupeve kriminale, ku në kuadër të operacionit të koduar "Stuhia", kanë rënë në pranga dy persona dhe tre të tjerë janë shpallur në kërkim. Bëhet fjalë për rastet e grabitjes së banesave në Kamzë, ku u bë i mundur arrestimi i shtetasve Ardit Elezi, 21 vjeç dhe Adrian Prela, 19 vjeç; të dy banues në Kamzë. Gjithashtu, janë shpallur në kërkim bashkëpunëtorët, shtetasit M. Gj., 34 vjeç, banues në Valias, Kamzë, i dënuar më parë për veprën penale "Drejtim mjeti pa dëshmi"; L. E., 28 vjeç, banues në Kamzë; D. T., 22 vjeç, banues në Valias, Kamzë. Këta shtetas në bashkëpunim me njëri- tjetrin vidhnin sende të ndryshme, goma automjetesh me gjithë disqe, vegla pune dhe i shisnin ato në treg me qëllim përfitimi vlerash monetare. Gjatë kontrollit të ushtruar në banesën e shtetasve Adrit Elezi dhe L. E, janë gjetur e sekuestruar në cilësinë e provës materiale sendet e vjedhura si goma automjetesh me gjithë disqe, trapan, sharra, çantë me vegla pune, si çelësa të llojeve të ndryshme. Si dhe u gjetën dhe sekuestruan në cilësinë e provave materiale mjetet: një armë zjarri pistoletë tip "BERETTA"; 4 fishekë model 7.65; 2 maska; 2 palë doreza; 1 palë gërshërë dry prerës; 1 xhup lëkure me ngjyrë të zezë; 1 palë tuta me ngjyrë blu të errët me viza të bardha, të cilat i përdornin për realizimin e veprave penale. Bëhet me dije se në vijim të veprimeve hetimore rezulton se shtetasit L. E., dhe D. T., janë bashkautorë të ngjarjes të ndodhur më datë 06.11.2017, në rrugën "Bulevardi Blu", ku dy persona te paidentifikuar nën kërcënimin e armës së dyshuar kanë tentuar të vjedhin kasafortën e një karburanti.