Përmbytjet Tiranë- Durrës, prokurori: Shkak, dëmtimi i kanaleve kulluese
Ankesat e banorëve, ministri i Brendshëm inspekton nga afër të përmbyturit "Pritet të nisin hetimet, banorët të denoncojnë rastet"
Prokuroria e Tiranës pritet të nisë hetimet pas përmbytjeve të mbrëmjes së enjte në autostradën Durrës- Tiranë. Prokurori Ervin Karanxha paralajmëroi dje se organi i akuzës do kryejë hetime për ndërtimet pa leje pranë autostradës. Gjithashtu, prokurori ngre dyshime se shkak i përmbytjeve ka qenë dëmtimi i kanaleve kulluese në këtë aks. "Do verifikohet nëse ka apo jo elementë të veprës penale që shkaktuan përmbytjet. Do verifikohen ndërtimet pa leje, bizneset dhe bllokimi i kanaleve kulluese. Kemi marrë denoncimet e bizneseve dhe banorëve, po bëjmë verifikimet tona. Sigurisht që do jenë objekt i hetimeve edhe palmat, por këtu ku ka ndodhur kjo nuk shohim ndonjë palmë. Qytetarët, nëse kanë pretendime, të bëjnë kallëzim në prokurorinë e Tiranës",tha prokurori Karanxha. Ndërkohë Ministri i Brendshëm, Fatmir Xhafaj për shkak të situatës problematike në autostradën TiranëDurrës, prej reshjeve të shumta, ka shkuar në terren për të parë nga afër gjendjen. Xhafaj ka diskutuar me banorët, të cilët kanë shprehur pakënaqësi të shumta.
PËRPLASJA E XHAFAJT ME BANORËT
Përmbytjet masive në autostradën Tiranë- Durrës kanë revoltuar banorët e zonës. Ministri i Brendshëm në një diskutim më qytetarët në autostradën TiranëDurrës, njoftoi për masat e marra për të përballur këtë situatë. "Policët i kemi të gjithë në dispozicion. Mund të them një fakt që e gjithë policia është në situatë të jashtëzakonshme. Që nga mbrëmja e djeshme e gjithë policia është në krye të detyrës. Ju i keni ndjekur, i
ka dhënë dhe televizioni juaj. Me këtë rast, kjo është shumë e rëndësishme, dua t'ju falënderoj edhe për të gjithë këtë sakrificë që keni bërë ju, sepse është shumë e rëndësishme në radhë të parë për qytetarët për t'u përshtatur me këtë situatë, e për të ndjekur rregullat përkatëse. E dyta, është një ndihmë shumë e madhe dhe për ne që e menaxhojmë këtë situatë",- është shprehur Xhafaj.
Ndërkohë banorët kanë shprehur pakënaqësi në përballjen më ministrin e Brendshëm Fatmir Xhafaj pasi e shohin situatën pa rrugëzgjidhje. "Ju kërkoni taksa dreqi e mori, po tani
ca do bëjmë ne, është shprehur një prej banorëve". Ndërsa, një tregtar tha se: "Ne jemi të pashpresë, ne jemi biznesmenë, ne jemi kuajt e ekonomisë, pa ne nuk ecën qerrja. Për këtë me vjen keq". Pas reagimeve të qytetarëve Xhafaj është shprehur i gatshëm që të ofrojë ndihmën e tij. Ministri i Brendshëm në përballjen me banorët ka theksuar se se ai është pjesë e qeverisë, e shtetit, dhe e ka për detyrim t'i shërbejë qytetarëve. Ndërkohë gjatë diskutimit më qytetarët një banor pohoi para ministrit se shtëpia e tij ishte përmbytur 7 herë dhe se ndërron çdo vit mobiliet. Teksa anko- hej i riu është përlotur, për këtë situatë Xhafaj i ka premtuar zgjidhje dhe i ka dhënë një numër telefoni ku mund ta kontaktonte. Për sa i përket makinave të dëmtuara ministri Xhafaj u shpreh se janë vënë në dispozicion karrotrecë që të normalizohet situata dhe të zhbllokohen rrugët. "Ne kemi vënë në dispozicion karrotrecët, ato mundësi që kemi, që t'i lëvizim. Kemi biseduar dhe me drejtorin dhe shefin e qarkullimit që, së pari, njëherë të jemi shumë të kujdesshëm, që të paktën ato që i ka dëmtuar natyra, mos të dëmtohen nga faktorë të tjerë të jashtëm dhe të jenë në prezencë vetë drejtuesit e mjeteve mundësisht. Edhe kur nuk janë në prezencë, të ketë mundësi policia, nëpërmjet karrotrecëve, t'i sistemojë diku, për të vazhduar pastaj. Dhe dy gjëra, fillimisht mjeti të ruhet aq sa mund të ruhen në këtë situatë dhe e dyta, që është shumë e rëndësishme, të normalizohet situata". Për sa i përket zhbllokimit të rrugës dhe kalimit në autostradën Tiranë- Durrës, Xhafaj tha se nuk mund të japë një përgjigje se kur mund të zhbllokohet, por është e rëndësishme të lirohet nga mjetet.