Mbledhja Shqipëri- Kosovë, 12 marrëveshjet që u firmosën
Rama pret Haradinajn nën borë. Kryeministri kosovar: Ndihmë për njohjet Dy kabinetet festojnë sot në Vlorë Ditën e Pavarësisë
Një mbledhje me sim bolikë bashkimin rreth një flamuri mund të quhet takimi i djeshëm mes dy kabineteve qeveritare të Kosovës dhe Shqipërisë. Kjo mbledhje e lajmëruar prej kohësh pati dje seancën plenare, ku u nënshkruan gjithsej 12 marrëveshje e memorandume bashkëpunimi, pikërisht në Shtëpinë e Flamurit, një prej ndërtesave simbol të qytetit të Korçës. Dy qeveritë e organizuan këtë takim të katërt nën moton "Një popull, një ëndërr". Ndërkohë që sot ata do të marrin pjesë në festimet për Ditën e Pavarësisë në qytetin e Vlorës. Moti nuk ka qenë aq mikpritës në Korçë, pasi sapo kishin nisur flokët e parë të borës në qytet, por protokolli zyrtar me respektimin e dy himneve u zbatua korrektësisht. Kryeministri Edi Rama madje ka hequr pallton dhe ka larguar çadrën kuq e zi që mbante vetë në dorë dhe i ka bërë të gjitha respektet "mysafirit" prej Kosove, siç e cilësoi ai. Në fjalën e mirëseardhjes, kryeministri shqiptar, Edi Rama tha: "Ne mund të themi me plot gojën se ka ende shumë për të bërë, por me patjetër, çka është bërë në këtë përpjekje të përbashkët, nuk është pak". Duke folur për deklaratën e përbashkët për ' Bashkëpunim dhe Partneritet Strategjik' mes dy vendeve, të nënshkruar në Prizren më 11 janar të 2014ës, Rama tha se, "edhe pse ka përfunduar linja e interkonjeksionit 400 KW mes dy vendeve, që për fat të keq ende nuk po vihet në punë për shkak të mungesës procedurale të krijuara nga jashtë, mbetemi në një impase sa të palogjikshëm, aq edhe të dëmshëm, në raport me këtë investim kaq të rëndësishëm. Kjo linjë e interkonjuksionit 400 KW është pa as më të voglin dyshim, një aks strategjik për të rritur ndërveprimin dhe jo thjesht për të afruar shumë më tepër të dy shtetet tona, por për të konsoliduar një proces tërësor rajonal. Të parët e kësaj linje si thjesht një linjë mes Shqipërisë dhe Kosovës është një mënyrë të pari me të cilën ne nuk pajtohemi dhe për të cilën do të vazhdojmë të bëjmë përpjekje që të ndryshojë", u shpreh Rama. Ai tha gjithashtu: "Jemi angazhuar po ashtu për të degëzuar gazsjellësin TransAdriatik për në Kosovë e më tej në rajon, çka do të krijonte akses në këtë linjë të rëndësishme të furnizimit me gaz edhe shtetit të Kosovës". Rama theksoi se do të fuqizojnë veprimin diplomatik në mbështetje të aspirat- ave euro- atlantike të Kosovës. Kryeministri shpreson që me nënshkrimin e marrëveshjeve të reja, do t'i jepet shtysë nxitjes së investimeve të ndërsjella. "Askush nuk mund të na pengojë më që të bëhemi edhe ne shkronjës të historisë së Europës moderne', tha dje Rama. Nga ana e tij, kryeministri i Kosovës, Ramush Haradinaj u shpreh, "se ky vit i cilësuar edhe si Viti i Skënderbeut pasqyron në vete ëndrrën tonë euroatlantike, të cilën më së miri e realizojmë së bashku". Duke renditur ndryshimet e bëra në Kosovë, Haradinaj tha: "Jemi të vendosur për dialogun me Serbinë, por dialogun e mendojmë tani në momentet finale dhe mendojmë se epilogu i dialogut duhet të sjellë njohjen mes Kosovës dhe Serbisë dhe që dialogu të arrijë epilogun e duhur, e mendojmë të nevojshme pjesëmarrjen e Shteteve të Bashkuara të Amerikës në dialogun e lehtësuar nga Bashkimi Europian dhe SHBA". "Forcimi i Kosovës dhe forcimi ynë në Ballkan përshpejtohet më mirë me bashkëpunimin mes Kosovës dhe Shqipërisë. Prandaj, puna e mirë që keni bërë i nderuar kryeministër për arritjet e këtij takimi të përbashkët dhe mundësia që të nënshkruajmë 12 marrëveshje e protokolle dhe njëkohësisht, puna e bërë, e avancuar, që do të çojë në të ardhmen e afërt deri në unifikimin e doganave, mendoj se na bën të ndihemi krenarë, por nuk mjafton".